Presidente encarga y presidente di Asamblea Nacional, Juan Guaido, a haya ayera un prohibicion pa eherce cualkier puesto publico durante 15 aña, di parti di regimen di Nicolas Maduro.
Elvis Amoroso, “contralor general” di Maduro, como presidente di Contraloria General di Nacion, a bisa cu el a dicidi di “prohibi ehercicio di cualkier puesto publico na ciudadano Juan Guaido pa e periodo maximo estableci den ley.”
Segun e representante di e regimen de facto, Guaido “a usurpa funcionnan publico y a comete accionnan cu gobierno stranhero cu a perhudica pueblo di Venezuela y patrimonio nacional.”
Na mes momento el a referi na e hecho cu Guaido lo a realisa 91 biahe sin autorisacion di Asamblea Nacional, pa un suma di 570 miyon bolivar. “El a permanece 248 dia fuera di e pais.”
El a reitera cu lo continua cu e investigacionnan contra Guaido, pa e presunto casonan di corupcion y a manifesta cu el a solicita na Seniat (Servicio Nacional Integra di Administracion Aduanero y Tributario) pa realisa e fiscalisacion di e hotelnan unda Guaido tabata hospeda.
Sin luz, tur scol y empresa cera
Mientras tanto, gobierno no a logra resolve e problema di electricidad y a anuncia diarason pasa cu ayera tampoco scol, entidadnan publico y sector priva lo habri, pa falta di luz. Cu seis dia di carnaval, un siman di e prome blackout, y tres dia caba di e actual apagon, luna di maart ta cerando cu menos di 10 dia di trabao cumpli.
