Ministronan di Relacionnan Exterior di Canada, Chile y Peru, miembronan di e Grupo di Lima, hunto cu e Alto Representante di Union Europeo, y e ministronan di Relacionnan Exterior di Portugal y Uruguay, miembronan di e Grupo Internacional di Contacto, a reuni ayera na sede di Nacionnan Uni na New York, pa papia tocante e situacion na Venezuela.
E reunion a refleha e decision di ambos grupo di aumenta e contactonan pa contribui na un solucion politico, pacifico y democratico di e crisis Venezolano. Nan a acorda cu e solucion mester ta uno Venezolano, pero cu e impacto regional di e crisis ta demanda cu e region y comunidad internacional mester hunga un rol mas activo den apoyo na un pronto regreso di democracia na Venezuela.
Ambos grupo a confirma nan compromiso pa un transicion pacifico, cu eleccion liber y husto. Tambe nan a ripiti nan apoyo na Asamblea Nacional, e unico organismo democraticamente eligi y a afirma e necesidad di restaura y respeta plenamente su poder, como tambe e liberacion di tur preso politico.
Nan a acorda pa continua un coordinacion estrecho, incluyendo e acercamento na otro actornan internacional relevante. Ambos grupo lo continua trahando hunto denunciando violacion di derecho humano na e pais, den cuadro di Conseho di Derecho Humano y otro organismonan multilateral.
Grupo di Lima y Grupo Internacional di Contacto ta coincidi den gravedad di e situacion humanitario, incluyendo e crisis migratorio, y a compromete nan mes pa continua asistencia humanitario na poblacion Venezolano y e paisnan bisiña afecta, di acuerdo cu principionan internacionalmente acepta. Nan a expresa nan apoyo na un respuesta coordina di Nacionnan Uni y a subraya necesidad di aumenta apoyo internacional, garantisando cu por entrega asistencia sin restriccion, ni interferencia politico.
