(NTN24) – Maria Corina ken ta recoriendo Venezuela, casi a ser agredi diabierna di siman pasa ora e personanan a bin riba dje y su acompañantenan mester a proteg’e.
Despues cu a supera e incidente aki, Machado a continua su caminda pa Maiquetia, den cual mas siguidonan a uni na su caravana, busnan y hendenan cu brommer a uni na dje.
“Ta tiki e personanan cu ta violento, ta hopi bunita loke ta pasando akinan,” Machado a bisa mientras e tabata cuminda memey di e gritonan di personanan cu tabata pidi un potret cune.
Maria Corina ta sigui su recorido na e pais a pesar cu Contraloria General di Republica a ratifica su impedimento di participa den actividadnan politico of di postula su mes pa un funcion publico, un hecho cu a provoca un malcontento den gran parti di e comunidad internacional.
Di esaki, Parlamento Europeo a condena e decision como “arbitrario y inconstitucional” di inhabilita politiconan di oposicion Venezolano manera Machado, Lopoldo Lopez, Enrique Capriles y Freddy Superlano, entre otronan, ademas di interveni den e regimen di proceso electoral di e pais.
“Mi ta bay te final,” el a bisa den un debate cu a haci cu otro shete candidato na eleccion primario cu ta bay celebra e dia 22 di october na unda ta busca eligi esun cu ta bay representa oposicion y lo enfrenta Nicolas Maduro na 2024.
Riba e mesun linea pero diasabra ultimo na Petare, militantenan di oficialismo Venezolano a ataca Maria Corina mientras e tabata haciendo un otro recorido den e bario di mas grandi di Venezuela na Caracas.
“Nos ta consciente cu e lucha aki cu nos ta dunando ta pa union di Venezuela y pa derota un tirania cu a dedica sembra teror y violencia manera nos ta mira awe,” e lider di Vente Venezuela a bisa.
Despues el a expresa cu “centenares di Venezolano cu tabata biniendo pa reuni cu nos a haya menasa di gruponan violento cu nos sa cu nan ta manda pa e regimen, personanan cu ta arma, cu ta bin agresivo pa hinca miedo na e sociedad.”
