(ElNacional) – E gobierno di Nicolas Maduro a cuminsa dialuna ultimo un campaña educativo tocante Esequibo, un teritorio rico di 160 mil vierkante meter cu e pais ta den disputa cu Guyana, na e scolnan, unda lo distribui 130 mil mapa nacional, e gobierno a informa.
For di un centro educativo na Caracas, e Minister di Educacion, Yelitze Santaella, a splica cu ta trata di un actividad pedagogico, denomina “El Esequibo es nuestro”, cu a cuminsa na e capital Venezolano y na e estadonan Miranda y La Guaria.
E campaña aki ta bay recore e pais, y cual su soberania ta depende precisamente di e conocemento cu su poblacion tin y sobre todo, su studiantenan,” el a expresa.
El a señala durante un actividad transmiti pa e canal estatal VTV, cu ta bay tin tambe dianan educativo na Caracas tocante Esequibo y e argumentonan historico cu Venezuela tin pa su defensa, mensahenan cu lo wordo replica na e scolnan.
Ariba su cuenta di Twitter, Santaella a sigura cu e Ehecutivo ta bay traha cu e institucionnan educativo pa asina e studiantenan conoce e teritorio a traves di e mapa cu tin biaha ta wordo representa sin e Esequibo, loke ta wordo critica pa e gobierno.
Diahuebs ultimo, e Corte Internacional di Husticia (CIJ) a declara cu e tin hurisdiccion pa pronuncia su mes ariba e conflicto teritorial aki y a rechasa e argumentonan di Venezuela, cu a solicita na e organo hudicial di Nacionnan Uni pa resolve y declara cu e intencionnan di Guyana no ta admisibel, mientras cu Guyana a pidi pa rechasa e excepcionnan preliminar di Caracas.
A pesar di tur cos, e gobierno Venezolano a celebra cu CIJ a declara admisibel su hurisdiccion pa pronuncia su mes ariba e disputa, mientras nan a presenta e revision di e conducta ilicito y fraudulento di e Reino Uni y a sigura cu lo evalua e implicacionnan di e decision aki pa adopta e medidanan pa e defensa di su derechonan legitimo y integridad teritorial.
