E general di division Ramon Rangel, cu a participa den e intento di golpi di estado contra Carlos Andres Perez dia 27 di november 1992 hunto cu Hugo Chavez, a divulga diadomingo un video den cual e ta expone su diferencianan cu e dictadura di Nicolas Maduro, y a haci un yamada na forsa arma nacional pa mantene nan mes na articulo 328 di constitucion di Venezuela.
“Nos no mester sigui bisa ‘leal semper, traidor nunca’, pasobra nos ta traidor. Traidor di un constitucion nacional. Den su articulo 328 ta bisa cu nos no mester ta servil na un persona o parcialidad politico,” e militar Venezolano a afirma.
Gradua na Scol di Aviacion na 1987, Rangel a relata cu durante seis aña e tabata testigo di con e dictadura Cubano a somete su pueblo ‘pa mas di 60 aña’: “E pueblo Cubano a ser someti bao di yugo di un dictadura castrocomunista pa mas di 60 aña. Nan ta biba den condicion di pobresa, cu nan ta adhudica na e blokeo, y esey ta falso. Nan a forma un nucleo di e grupo castrocomunista ey, cu no ta laga e recursonan cu nan tin, cu ta hopi, yega na estado Cubano. Nan ta gaña nan, y nan sa esey.”
Rangel a haci un yamada na e militarnan, pa termina cu e influencia di Cuba na Venezuela. Hasta el a sugeri cu tal bes ta e Cubanonan lo a kita Chavez for di caminda. “Ken ta bisa cu no tabata nan cu a mata comandante Chavez pa kit’e di caminda y lag’e liber pa cualkier cu bin na cabes di estado Venezolano pa e percura pa nos rikesa bay Cuba.”
