Venezuela: Futuro di Citgo colga na un hilo

E firma minero Canades Crystallex, cu ta den kiebra, a ricibi permiso di un tribunal federal Mericano permiso pa reanuda e demanda contra accionnan den e compania di refinacion Citgo, cu actualmente ta bao control di gobierno di Juan Guaido, reconoci pa gobierno Mericano.

E representantenan di Guaido a pidi un extension di 45 dia pa un ‘hearing en banc’ (petitorio di audiencia) unda un panel di hues lo a re-examina un veredicto di juli di e Corte di Apelacion di e tercer circuito di Estadonan Uni, cu a permiti cu Crystallex por a bay tras di e bienes di Citgo, pero e representantenan no a presenta ningun peticion, pa cual e tribunal a lanta e suspemsion. Asina mes, Crystallex ainda mester di un licencia di Departamento di Tesoro Mericano prome cu nan por cuminsa bende e activonan.

E disputa entre Crystallex y estado Venezolano ta centra riba e nacionalisacion di nan propiedadnan na Venezuela pa Hugo Chavez, unda Crystallex tabatin varios mina di oro bao nan control. E compania a presenta un demanda di arbitrahe pa perdida di inversion y, na 2017, un tribunal di Delaware a ordena Pdvsa, bao control di Maduro ainda, indemnisa e compania Canades pa $ 1,4 biyon, un decision cu Pdvsa tabata apelando desde e tempo ey.

E decision hudicial di juli tambe por habri caminda pa otro demandante di indemnizacion contra Venezuela. Na maart pasa, Banco Mundial a dicta cu e proyectonan petrolero expropia di ConocoPhillips,mester haya un indemnisacion di $ 8,7 biyon. E aña anterior, Camara di Comercio Internacional a otorga ConocoPhillips un veredicto faborable pa $ 2.000 miyon pa otro activo den petroleo expropia. ConocoPhillips a logra hudicialmente cera e instalacionnan propiedad di Pdvsa den Caribe Hulandes te cu a yega na un acuerdo pa e suma anterior.

E tenedornan di bono Pdvsa  2020, y e empresa Ruso por bira e promenan pa realisa nan demanda contra Citgo. E bono di $ 3,4 biyon tin 50,1% di e accionnan di Citgo usa como garantia. E otro 49,9% di accion ta garantia pa Rosneft haya su pago riba un prestamo. Gobierno di Guaido tin awor te 27 di october pa haya otro $ 913 miyon pa evita perde e refinerianan na Merca.