Autoridadnan Venezolano a aresta presidente y dos otro funcionario den un investigacion pa corupcion den e empresa ‘joint venture’ Petrolera Sinovensa (Petrosinovensa), propiedad di Pdvsa y di China National Petroleum Corp (CNPC), asina agencia Reuters a tende di personanan di e sector petrolero y di fuente di inteligencia. E tres personanan deteni tur ta Venezolano.
E detencion di presidente di Petrosinovensa, Alberto Emilio Bockh Moreno, a keda confirma na Reuters pa cinco fuente di Pdvsa y un fuente di inteligencia y otro persona di sector petrolero local, cu conoce e caso. No tabatin claridad kico ta e acusacionnan exacto contra Bockh y e otro dos empleadonan deteni.
Segun medionan local, e operativo a tuma lugar diahuebs pasa pa agentenan di Direccion General di Contrainteligencia Militar (Dgcim) den instalacionnan di e empresa mixto, situa na Barcelona, estado Anzoategui. Segun e medionan ta acusa e personanan di soborno, di conspira cu contratista y di asociacion pa comete delito.
Petrosinovensa a cuminsa un proyecto di expansion pa aumenta produccion te na 165.000 bari pa dia (bpd), segun presidente Nicolas Maduro na augustus, di un capacidad actual di 110.000 bpd.
Propiedad di e subsidiario di PDVSA, Venezuelan Petroleum Corp (CVP) hunto cu CNPC, Sinovensa ta produci crudo Orinoco extrapisa y ta mezcla esaki cu crudo mas liviano pa produci e mezcla Merey 16.
Aña pasa, Venezuela a bende un participacion adicional di 9,9% cu CNPC den Petrosinovensa, cu a haci cu CNPC tin actualmente 49% di e accionnan.
No tabatin comentario inmediato di Pdvsa o di gobierno Venezolano tocante e caso na Petrosinovensa.
