(AP) — Fraccionnan politico batayando a subi cayanan di capital Venezolano ayera pa e prome rallynan di competencia di aña di eleccion presidencial, demostrando nan habilidad di atrae hende en masse, mientras votadornan ta lucha cu decepcionnan politico y incertidumbre riba e candidato cu finalmente ta bay reta presidente Nicolas Maduro.
Sostenedornan di partido gobernante di Maduro y lider di oposicion Maria Corina Machado a manifesta na Caracas un dia despues cu fiscal top di Venezuela a anuncia e detencion di mas cu 30 persona y ordennan di aresto pa otro decena kende supuestamente a planea esfuersonan pa desestabilisa e gobierno di e pais Sur Americano.
Pero si cualkier di e bandanan tabatin speransa di spanta otro cu su multitud, ningun di nan a atrae e diesmiles cu si tabata capaz di atrae decada pasa.
Sostenedornan di Maduro – abrumantemente un mescla di trahadornan estatal, lidernan comunitario di partido den gobierno y hende leal na difunto presidente Hugo Chavez – a cana door di ciudad, cu decenas di nan tambe concentrando riba e mesun plaza unda Machado, ganador di un eleccion presidencial primario na october, tabata spera di dirigi su mes na su propio sostenedornan.
Mas cu un ora despues cu Machado mester a presenta, su sostenedornan a bandona e plaza y a stop trafico, permitiendo Machado pa adresa nan for di un escenario improvisa mientras tabata zwaai bandera Venezolano.
“Nan ta papia di eleccion, pero nan tin miedo di eleccion,” Machado a bisa, referiendo na Maduro y su aliadonan. “Pero pasobra nan sa cu nan no tin voto, nan ta sconde… tras di menasa, persecucion, mentira, un sentencia fabrica, pa purba di caba cu nos. Laga nan sa claramente, ningun hende ta saca nos di e ruta electoral aki.”
Maduro y e fraccion di oposicion tras di e primaria a bay di acuerdo aña pasa pa tene un eleccion presidencial den segundo mita di 2024. Maduro ta bay busca pa agrega seis aña mas na su presidencia di un decada largo marca pa crisis.
Participacion di su oponente den eleccion ainda ta keda den duda maske el a gana e primario cu mas cu 90% di sosten. Gobierno a prohibi e ex-legislador di postula pa e cargo, y Fiscal General, Tarek William Saab a habri investigacion contra organisadornan di e primario, cu a tuma lugar sin sosten di autoridadnan electoral di Venezuela. Autoridadnan no a mustra ningun evidencia den sosten di un prohibicion contra Machado, kende a sigui campañando, insistiendo cu ta e votadornan y no esnan leal na e partido den gobierno, ta esnan cu tin derecho pa tuma decision riba su candidatura.
Pero e incertidumbre ta sembrando duda entre su sostenedornan.
Manager di marketing digital Yeickson Ramos ta considera Machado “e opcion mas serio y creible” cu oposicion tin “pa reta gobierno.” Pero na e rally ayera, Ramos, 33, a reconoce e necesidad urgente pa oposicion determina e stapnan pa sigui si gobierno no ta retira e prohibicion riba Machado.
“E ta bay scoge (su substituto)?” segun Ramos, kende tabata testigo di e apatia cu e fayonan anterior di oposicion a crea entre votadornan. “Of ta bay tin un negociacion interno cu ta conclui cu no por ta ningun di e candidatonan di primaria cu a ricibi sosten minimo, pero nos ta bay tin cu busca un opcion cu ta atractivo pa e poblacion.”
Oposicion, cu ta conta cu sosten di Merca, a sorprende su aliado- y adversarionan na momento cu mas cu 2.4 miyon persona, incluyendo den barionan pa largo considera como fortalesa di partido gobernante, a vota den e primaria. E turnout halto a sucede a pesar di varios contratempo y esfuersonan di gobierno pa desacredita y descurasha participacion den eleccion.
Na december, gobierno di Maduro a keda sorprendi un biaha mas na momento cu a tene un referendum riba reclamo di parti di Guyana, y centronan di votacion tabata mustra virtualmente desierto riba dia di eleccion. Maduro y su aliadonan ta insisti cu mas di 10 miyon persona a vota. Asina mes, ausencia di rijnan largo cu ta tipico durante un eleccion convoca pa partido gobernante a demostra su incapacidad pa mobilisa sostenedornan, hasta ora algun di nan ta rekeri pa entrega prueba di participacion pa retene nan trabao of mantene cierto beneficio di gobierno.
Chavistanan pa largo ta cauteloso ora di expresa critica contra Maduro, kende a keda scogi personalmente pa Chavez pa lidera Venezuela tiki prome cu el a fayece na 2013. Un crisis compleho di dies aña cu a pusha miyones den pobresa acopla cu e scandalnan recien di corupcion ta poniendo hende cuminsa papia.
Leonard Suarez, un abogado di Caracas, a vota pa Chavez y Maduro den eleccionnan anterior. E aña aki, e ta bisa cu e kier mira riba e papeleta un persona otro cu Maduro representando e idealnan di Chavez despues di conclui cu “mantene solamente un persona na poder ta cria corupcion.” Den nomber di democracia, Suarez a bisa, lo miho ta pa Machado aparece riba e papeleta.
“E mester participa pasobra e lo ta un ehemplo di e democracia cu ta existi den nos pais,” el a bisa cerca di demostracion di partido gobernante. “Y no solamente e, cualkier candidato cu a expresa nan intencion pa participa den un eleccion presidencial mester participa.”
