(NTN24) – Lider opositor, Maria Corina Machado a keda deteni pa forsanan di seguridad di regimen di Nicolas Maduro, algun minuut despues cu el a aparece riba un tarima memey di e manifestacion cu el a lidera riba caya di Chacao, na Caracas.
Segun a bira conoci, a hiba e lider opositor y e homber cu tabata transport’e riba un motorcycle despues cu el a baha for di e tarima unda el a duna un discurso.
“A intercepta Maria Corina violentamente na su salida for di e concentracion na Chacao. Nos ta spera confirma su situacion den algun minuut. Efectivonan di e regimen a tira riba e motorcyclenan cu tabata traslad’e,” comando Con Venezuela a informa riba rednan social.
Machado a presenta den publico despues cu el a permanece mas di 130 dia den clandestinidad pa motibo di e menasanan cu e ta sufri diariamente.
Den su discurso anterior, e lider opositor a celebra e convocatorio y a sigura cu e regimen di Maduro “a hundi.” For di Chacao, Machado a dirigi palabra na un multitud cu a congrega rond di dje, y a referi na e debilidad di e regimen despues di eleccion dia 28 di juli ultimo.
Ademas, el a señala cu awe mainta cu autoproclamacion di e regimen di Maduro ta clausura un fase. “E forsa aki cu nos a construi ta prepara nos pa termina e fase aki. Kico cu nan haci mañan, ta caba di dera nan. No laga niun hende duda, loke nan haci mañan ta sentencia e fin di e regimen,” el a subraya.
Den e sentido ey, el a indica cu “si nan consumi e crimen contra Constitucion y soberania popular aki, nan ta sentencia nan destino,” concluyendo cu “Venezuela ya a dicidi y ta liber.”
E aresto shockeante a genera yamado pa su liberacion inmediato for di gobierno- y lidernan na America Latino y resto di mundo.
Edmundo Gonzalez, invocando e titulo di presidente-electo reconoci pa Merca y otro pais, a exigi liberacion di Machado for di exilio. “Na e forsanan di seguridad, mi ta adverti boso: No hunga cu candela,” el a bisa den un post riba rednan social for di Republica Dominicana, unda el a reuni cu presidente Luis Abinader y un delegacion di ex-presidente Latino Americano.
Pa alrededor di 4pm ora local, medionan di comunicacion a informa cu Machado a keda den libertad despues cu a fors’e pa graba varios video. Comando Con Venezuela a bisa cu “durante e periodo di su secuestro a fors’e pa graba varios video y despues a liber’e,” indicando cu Machado lo dirigi palabra na pueblo pa splica e hechonan despues.
E manifestacionnan convoca pa Machado a tuma lugar un dia prome cu e Asamblea Nacional controla pa e partido den gobierno ta programa pa huramenta Maduro pa un di tres termino di seis aña, a pesar di evidencia cu el a perde eleccion presidencial.
