Departamento di Husticia Mericano a solicita documento di Citgo Petroleum Corp, filial di Pdvsa, den un investigacion tocante soborno. Citgo a confirma den un comunicado dialuna cu nan a ricibi un citacion y cu nan a acorda di coopera cu e investigacion, cu a habri contra proveedornan di e empresa na Merca.
E proceso hudicial a inicia net ora e compania a pasa den man di un ekipo controla pa e lider opositor y presidente interno, Juan Guaido. Citgo tin actualmente un hunta temporal cu a corta tur laso cu Pdvsa, despues di e sancionnan Mericano pa para e fluho di placa cu tabata bay pa Pdvsa y gobierno di Maduro.
Tin 21 persona acusa den e investigacion pa soborno. Di e grupo aki, 16 a declara culpabel e luna aki. Gobierno di Maduro a califica e investigacion di corupcion como un campaña di desprestigio contra Pdvsa y e gobierno mes.
E citacion pa Citgo a bira conoci despues cu Jose Manuel Gonzalez, empresario na Miami, a admiti cu el a paga soborno pa haya contract cu Citgo y Pdvsa, entre fin di 2012 y mitad di 2014. Por lo menos cuatro funcionario di Citgo a sali beneficia. Ademas e empresario a paga por lo menos 629.000 Dollar na un funcionario halto di Pdvsa.
Abogadonan externo di Citgo tabata revisando e compranan haci durante e tempo cu Gonzalez a admiti di a paga soborno.
Pdvsa y el Salvador
Den otro noticia, siman pasa diabierna Fiscalia General (FGR) di El Salvador a invadi instalacionnan di ALBA Petroleos, liga na Pdvsa di Venezuela, pa supuesto labamento di placa.
German Arriaza, director Anticorupcion y Contra Impunidad di Fiscalia, a splica cu e invasionnan tabata tambe na e empresanan ALBA Alimentos de El Salvador, ALBA Gas y otro 24 sucursal relaciona cu e sociedadnan.
ALBA Petroleos a ser funda na 2006 pa Pdvsa y gobierno izquierdista di Frente Farabundo Marti pa Liberacion Nacional (FMLN), aliado di gobierno di Chavez y Maduro.
