(ElNacional) – Casi un centenar di persona, entre nan activistanan y varios ONG di Venezuela, a participa ayera den un concentracion berde dilanti e sede di e Asamblea Nacional (AN, Parlamento), na Caracas, pa exigi e legalisacion di aborto, penalisa den e Codigo Penal.
Den e manifestacion, convoca en conexion cu e Dia pa Despenalisacion y Legalisacion di Aborto, e color berde tabata domina, color cu ta representa e lucha aki, y e mayoria di e participantenan, den su mayoria hende muhe, tabata canta frasenan y a hisa posternan cu mensahenan den cual nan tabata exigi pa interupcion di embaraso ta legal, sigur y gratis.
“Ni cera pa aborta ni morto pa purba,” “Bira mama ta un decision, no un imposicion,” y “Pafo di e religion di nos ovarionan,” algun di e posternan tabata bisa.
“E ta un necesidad, e ta parti di nos derechonan humano,” e psicologo Bolivar Perez, miembro di un organisacion cu ta traha cu sobrevivientenan di violencia di genero, a bisa, ken a sigura cu na Venezuela aborto ta ilegal incluso den casonan di abuso sexual.
El a sigura cu, hende muhe di tur status social ta aborta, esnan cu tin mas riesgo di perde nan bida ta e hende muhe pober, door di cual el a expresa cu e mester ta sigur, liber y gratis.
E activista y abogado Richelle Briceño a bisa cu e pais ta un di e tanto paisnan cu ta criminalisa hende muhe pa aborta.
El a afirma cu e hecho cu ta existi e penalisacion di aborto no kiermen cu esaki no ta sucede di manera clandestino y cu ta pone den riesgo e bida di e hende muhe.
“Venezuela ta un pais unda e cifra di embaraso trempan ta number un den henter Sur America, y esaki no ta mas cu e producto di un Estado cu a lubida su obligacionnan pa loke ta trata educacion sexual y reproductivo,” el a agrega.
E colectivo feminista a propone un ley cu ta contempla e eliminacion di cuater articulo di e Codigo Penal, den cual ta establece castigo di prizon pa hende muhe cu realisa un aborto.
Januari ultimo, e alto comisionado di Derechonan Humano di ONU (Acnudh), Volker Turk, pidi e gobierno pa revisa e normanan cu ta penalisa e aborto y provoca e morto di hende muhe.
