Si no percura pa importacion di 39.000 bari di gasolin pa dia, e pais ta core riesgo di keda sin combustibel pa fin di luna di april, segun e diario El Universal.
Asina e experto petrolero Rafael Quiroz ta adverti, ken ta recorda cu e combustibel aki cu tabata cumpra na Merca te awor, desde 28 di april proximo, debi na e sancionnan nobo lo no yega mas.
El a indica cu gobierno tin cu busca con pa importa di otro pais cu por suministra, aparte di gasolin, tambe diluente y crudo liviano pa mescla cu e crudo pisa di Orinoco, cu actualmente ta forma un gran parti di e produccion nacional di crudo.
Den entrevista via internet Rafael Quiroz a enfatisa cu “Venezuela mester di 250.000 bari pa dia di gasolin y ta produci cerca di 200.000. Tur loke nos no ta produci ta bin di Merca,” y desde 28 di april no ta yega nada mas.
E specialista a señala cu si no ta resolve e problema, despues di 28 di april nos lo tin gasolin ainda pa 10 dia so.
Di su parti secretario general di Sindicato di Trahado di Petroleo y Gas, Ivan Freites, a sigura cu ningun hende den e pais aki por bisa te ki momento lo tin gasolin ainda.
Freites a splica cu “gobierno ta haciendo interupcion planea y a traves di corte di electricidad ta dicidi ki ora banco ta habri, ki ora e stacionnan di gasolin ta habri y ki ora comercio por habri, y esaki ta duna gobierno dominio riba e inventarionan di gasolin; ta p’esey ningun hende por bisa cuanto dia lo tin gasolin ainda.”
Loke ta conoci, Freites a añadi, ta cu ta drentando gasolin a traves di canalnan di e empresa di petroleo Ruso, Rosneft y otro empresanan liga na esaki.
