Na Venezuela e falta di combustible pa vehiculo ta birando mas urgente, lagando e pais ainda mas vulnerable pa e crisis causa pa e coronavirus, cu ta plamando silenciosamente.
Aunke parti di e ayudo medico ta yega di China y di algun organisacion internacional, e escasez di combustible lo por impedi e distribucion. Forsanan arma a cuminsa vigila e poco stacionnan di gasolin cu ainda tin combustible den nan tankinan pa sigura cu e suministro ta solamente pa distribucion di alimento, servicio medico y actividad relaciona cu seguridad, segun un asistente di ministro di Defensa, Vladimir Padrino.
“No tin gasolin,” un oficial di ehercito asigna na inteligencia interior a bisa Argus. “E unico gasolin cu Pdvsa tin almacena ta den e tankinan di e stacionnan di servicio, y despues cu esey caba no tin nada mas, te ora yega mas gasolin importa.” Pdvsa y ministerio di petroleo a priminti cu e gasolin importa lo yega pronto, sin duna mas detaye.
Pdvsa ta controla tur importacion y distribucion di combustible, y e suministro tabata bao nivel di demanda durante varios aña, pa un parti debi na e contrabanda cronico na frontera y e transferencia gratis na e aliado politico, Cuba. E prijsnan di combustible na punto di benta ta casi cero den termino real, debi na falta di adaptacion di prijs den e crisis di hiperinflacion. Tempo cu e mercado Venezolano tabata balansa y economia tabatin un base solido, e pais tabata consumi alrededor di 700.000 bari pa dia (bpd) di producto deriva di petroleo.
Ministerio di salud a bisa cu ayera tabatin 48 caso confirma di coronavirus, 12 mas cu un dia antes. Pero Venezuela, mas cu resto di America Latino , ta mal prepara pa evalua o trata paciente.
