E emergencia energetico cu Venezuela ta sufriendo por bira mas grave awor cu tambe tin escasez di gasoil y di gas natural, segun e specialista Antonio Patiño, miembro di e Asociacion Venezolano di Ingeniero Electricista, Mecanico y Profesionnan Similar (AVIEM) señalando cu si produccion di e dos hidrocarburonan aki no drecha, plantanan termo-electrico di e pais ta den problema.
E ta opina cu lo ta imposible e luna aki pa combati e interupcion continuo di coriente, si Pdvsa ta sigui na e nivel abao di operatividad actual.
Un gran parti (entre 60 – 70%) di electricidad genera na Venezuela ta bin di e dam gigantesco Guri na estado Bolivar. Sin embargo, pa e resto di e suministro di coriente e pais ta depende di varios planta di electricidad cu ta opera a base di gasoil o gas natural. E problema di produccion di Pdvsa, cu tin practicamente tur cinco refineria paralisa, cu consecuencia cu no tin gasolin pero tampoco gasoil pa e centralnan.
Pa loke ta e centralnan cu ta opera cu gas natural, Patiño ta bisa cu “e gas no ta yega cu e presion rekeri na e tuberia di suministro di e centralnan termo-electrico, debi na e reduccion di e produccion di petroleo, loke ta haci cu e centralnan ta kedando practicamente for di servicio. Un di e problemanan cu ta afecta e decision di sigui instala mas central termo-electrico, pa alivia e sistema nacional, ta cu no tin suficiente combustible pa nan opera.”
Gasoil y gas natural ta e elementonan cu mester pa genera energia den por lo menos 18 planta termo-electrico di e pais. Na Lara ta existi tres, pero un so ta operativo.
