Venezuela lo ta exportando un fluho constante di methanol a traves di transferencia di ‘barco pa barco’ cerca di Aruba, generando un entrada continuo cu ta fuera di control di e sancionnan Mericano, segun un noticia treci pa agencia noticiero Argus Media.

Produccion di methanol ta bin di e compleho di Metanol de Oriente (Metor), di 1,6 miyon tonelada pa aña na Jose, e terminal na Anzoategui cu ta mas conoci pa exportacion di crudo, y tambe pa e instalacionnan di mehoracion y mezcla di crudo di Orinoco.

Metor ta un joint venture entre e subsidiario di Pdvsa Pequiven y su partnernan mayoritario Mitsubishi y Mitsubishi Gas Chemical. E planta Metor 1 di 750.000 ton/aña y Metor 2 di 850.000 ton/aña ta ricibi cerca di 160 miyon pia cubico pa dia di gas natural di e planta di gas di Pdvsa, PDV Gas. E gas ta bin di distrito Anaco den parti oriental di Venezuela.

Di acuerdo cu fuentenan di despacho maritimo, e transferencia di ‘barco pa barco’ (‘Ship to Ship Transfers’) di methanol Venezolano ta tuma lugar regularmente cerca di Aruba. Pa minimalisa riesgo pa e barconan y pa e cumpradornan, e traspaso di un barco pa otro a bira mas comun desde cu Merca a impone sancion riba Pdvsa na januari 2019.

Den e ultimo operacion, e barco bao bandera di Panama Kokuka Glorious a carga alcohol na Jose y a pasa su carga den awanan di Aruba pa e barco bao bandera di Marshall Islands Fairchem Katana, cu a sali dia 4 di april pa Rotterdam. E promer barco tabata di bolbe na Jose dia 6 di april, pero manera mayoria di tankernan den awanan di Venezuela, el a paga su transponder.

Entre diferente uso, methanol ta un componente di MTBE, cu Pdvsa ta usa tradicionalmente pa traha gasolin. Casi henter Pdvsa su capacidad di refina ta paralisa despues di añanan di negligencia y falta di piesa y crudo, contribuyendo na e actual escasez di combustible na Venezuela.

Venezuela su exportacion di methanol ta coincidi cu e paro y reduccion di produccion di otro productornan, como consecuencia di e demanda mundial reduci . Na Trinidad & Tobago, e productor grandi Methanex a para su planta Titan di 850,000 bari pa dia (bpd) y mas reciente su planta Chile 4 na sur di Chile, di 800.000 ton/aña. Tambe e compania Canades a pospone recientemente un proyecto di $ 500 miyon na Louisiana.