(LaPatilla) – E exportacionnan di petroleo di Venezuela luna pasa a supera 700 mil bari pa dia debi na e suministronan di disolventenan importa cu a impulsa e produccion y envionan, segun documentonan di e empresa estatal PDVSA y datonan di siguimento di Refinitiv Eikon.
Venezuela a recupera su produccion y capacidad di mescal den e ultimo simannan despues cu Iran, un di e aliadonan mas importante di e nacion, a cuminsa suministra regularmente disolvente pa e petroleo extra-pisa di e Faha di Orinoco. E suministronan Irani ta disminuyendo e impacto di e sancionnan Mericano den e produccion di e pais.
Na october PDVSA y su empresanan conhunto a manda 30 cargamento di crudo y productonan refina, principalmente pa Asia, incluyendo un cargamento di 2 miyon bari di crudo pisa Merey pa paga Iran pa e disolvente ricibi.
Ta spera cu e segundo cargamento di disolvente Irani di e acuerdo di cambio lo wordo descarga for di e barco petrolero Dorena na e Puerto Jose di PDVSA e luna aki, segun e documentonan.
E exportacionnan di Venezuela ta di un promedio di 711.193 bari pa dia na luna di october, e tercer promedio mas halto di e aña y un aumento di 76% compara cu september, ora cu e falta grave di disolvente a obliga PDVSA recorta e produccion y mescla.
E exportacionnan di petroleo di Venezuelo, cu hunto cu esunnan di Iran ta bao di e sancionnan Mericano diseña pa limita e bentan, a stabilisa e aña aki na alrededor d 633 mil bari pa dia, un aumento chikito compara cu e 626 mil bari pa dia di aña pasa, pero asina mes un disminucion grandi compara cu añanan anterior ora cu PDVSA no tabata inclui den e black list pa e Departamento di Tesoro di Merca.
