Importacion di crudo Venezolano na Merca a cay te na cero siman pasa, pa prome biaha den historia di registracion, asina datonan preliminar di Energy Information Administratio (EIA) na Merca ta mustra, segun agencia Reuters.
E importacion desde Venezuela, historicamente un di e proveedornan di petroleo mas grandi di Merca, a collapse di como 587.000 bari pa dia (bpd) na fin di januari, despues cu Washington a golpea gobierno di Nicolas Maduro cu un serie di sancion.
Esaki ta keda traduci den entre 11.000 miyon y 15.000 miyon dollar cu no lo drenta Venezuela cu e paralisacion di envio di crudo pa Merca, segun e website Mundo24.
Desde e sector petrolero Venezolano mes a confirma e paro total di exportacion di Pdvsa pa Merca den e ultimo dianan. Sin embargo, y pa awor, Venezuela ainda ta bendiendo crudo na su aliadonan China y Rusia. No ta conoci cu Venezuela ta haya pago pa esaki o cu ta considera esaki pago na nan pa prestamo pendiente na Venezuela. Mientras tanto, tabatin noticia di India cu ta considerando para benta di producto petrolero cu Venezuela, pa temor pa sancionnan Mericano, aunke tambe tin señalnan cu Reliance Industries, e compania cu lazonan cu Venezuela, no a descontinua envio ainda.
E falta di divisa y e reduccion den produccion di crudo ta golpeando regimen di Maduro. Como consecuencia di e sancionnan imponi pa Merca desde januari, e recursonan financiero di Pdvsa y su filial Citgo na Houston a sufri golpi fuerte. Ademas Citgo y tur empresa liga na nan y na Pdvsa cu ta estableci na Merca, a pasa den man di gobierno di Guaido. Beneficionan na Merca mester bay riba un cuenta blokea, cu excepcion di transaccion dentro di e consorcio permiti bao di e licencia di excepcion 7-A, otorga pa Oficina di Control di Activo Starnhero (OFAC).
