E principal terminal di exportacion di petroleo di Venezuela, Jose, na estado Anzoategui, a reanuda operacion y ta saliendo crudo atrobe di e pais, despues cu e blackout di cinco dia a para trabao na e terminal aki tambe. E exportacion, di vital importancia pa economia di e pais, a keda para pa e blackout cu a afecta tur actividad economico desde diahuebs siman pasa. Energia electrico ta restavbleci den mayor parti di e pais actualmente.
Tambe e upgradernan Petrocedeño y Petrosinovensa, cu ta produci un crudo liviano, a reinicia operacion, mientras cu Petromonagas y Petropiar, e otro dos upgradernan, tabata haci prearacion pa cuminsa opera atrobe. E blackout a laga tur cuatro planta cu un operacion minimal durante varios dia y lo a afecta tambe e refineria di Puerto la Cruz.
E cargamento di e barconan a cuminsa diamaras pasa, cu entre otro e barco Suezmax Fontana fleta pa Petrochina y cu destino China, cu a caba di carga ayera. Ningun carga di exportacion a sali di Venezuela desde dia 7 di maart, segun e datonan di registracion di barco.
Ministerio di Petroleo di Venezuela y Pdvsa no a responde di inmediato riba e solicitudnan di comentario.
E blackout a haci e problemanan cu industria petrolero Venezolano tin despues cu Merca a impone mas sancion ainda riba Pdvsa, pa obliga presidente Maduro bandona su puesto. En total ta calcula cu e pais a perde mas di 875 miyon dollar cu e blackout, segun calculo di Asdrubal Oliveros, director di e agencia Ecoanalitica.
