Escasez di medicamento di cualkier tipo a keda na 85% den botica y centronan di salud di teritorio nacional, ya cu por haya solamente un y mey di cada 10 remedi.
Entre e motibonan pa e ausencia di e medicamentonan na e puntonan di atencion medico ta considera e control di cambio riguroso di divisa, debi na e imposibilidad di haya divisa ta obliga e empresanan, cu no tin materia pa produci, pa bay cana busca riba mercado preto, segun e corant El Mundo, di Spaña.
Tambe esaki tin relacion cu e imposicion y regulacionnan di Nicolas Maduro encuanto prijs y cantidad di medicina cu ta permiti pa cada Venezolano. Un ehemplo di esaki ta e benta di ocho pildora di remedi di proteccion di stoma conoci como Omeprazol, cu apenas ta alcansa e prijs di dos shen Dollar riba mercado paralelo.
Na 2014 e porcentahe di escasez ainda no tabata pasa 60%, pero birando mas di 80% den cuatro aña, ta duna evidencia di e gravedad di e situacion di insolvencia di remedi pa e ciudadano, loke ta pone e gremio di salud den un posicion grave pa varios aña caba.
Mediconan tin añanan ta denuncia e limitacion den atencion di salud, desde falta di material pa atende pashent, te na ciere di botica cu ta haci yega na medicamento mas dificil ainda.
E victimanan directo di e desastre aki ta 140.000 pashent di cancer, mas di 300.000 pashent cu problema di curason, 300.000 persona cu enfermedad cronico, manera Parkinson y hemofilia, y 79.000 persona cu HIV. Desde 2016 nan no ta haya tratamento mas, o solamente di forma intermitente, loke ta haci nan salud hopi daño.
