Presidente di Federacion Farmaceutico Venezolano (Fefarven), Freddy Ceballos, a indica diabierna pasa cu na e pais ta registra un desabastecimento di 80% di medicamento y e poco cu por haya ta na prijs inalcansable pa e Venezolano comun y coriente.
El a manifesta cu e deficit ta entre 75 y 80 %, y a agrega cu e medicinanan cu tin riba shelf ainda no ta pa e “superproduccion” sino pasobra e ciudadano no por paga nan.
Ademas el a alerta pa un entrevista na TVVenezuela cu debi na e hecho cu e ciudadano no ta cumpra e medicamento, nan ta keda hopi mas tempo riba shelf, creando un problema di calidad pa vencimento.
Por lo tanto el a bisa relaciona cu resolucion 075 di ministerio di Salud, unda ta resalta cu ta permiti entrada di medicamento, pero sin registro sanitario y a cataloga esaki como “entrega di soberania den materia di medicamento.”
E escasez general ta genera problema den diferente sector medico, entre otro den cuido medico infantil, unda famia di mucha na riesgo a denuncia e falta di medicamento y otro material medico, loke ta resulta den imposibilidad di haci cirugia mas complica manera transplante y ta causa condicion sanitario precario den centronan di salud na Venezuela.
Pa directora di ONG Prepara Familia, Katerine Martinez, e situacion di e sistema di salud infantil den henter Venezuela ta dramatico y ta atenta contra bida di e menornan.
Di su parti gobierno a reporta 16 morto pa cada 100.000 habitante na 2016, y a nenga di publica cifra oficial di mucha cu a fayece despues. Ademas gobierno ta argumenta cu nan no por paga debe riba medicamento y insumo medico na otro pais debi na e sancionnan imponi pa Estadonan Uni.
