Desde bastante tempo gobierno di Nicolas Maduro ta tratando di percura pa e areanan urbano keda haya suficiente combustible mientras cu suministro na e areanan rural pa algun tempo caba ta fayando. Caracas a amanece ayera cu e rijnan largo conoci di e otro partinan di e pais, cu un obvio falta di suficiente combustible pa sirbi tur usuario.
Manuel Fajardo, coresponsal di Union Radio na Caracas, a conta periodista Shirley Varnagy cu funcionarionan policial di e municipionan Chacao, Baruta y El Hatillo ta vigilando na e pompnan di gasolin.
Francisco Bello, analista y specialista den encuesta di opinion, a bisa riba Twitter cu e rijnan pa gasolin na Caracas ta inevitable. El a bisa cu Venezuela ta produci menos di 20% di petroleo cu na 1998, tempo cu Hugo Chavez a yega na poder.
“E pais cu mas reserva petrolero di mundo ta produci menos cu Colombia, mita di Mexico y Argentina y 20 biaha menos cu Merca,” e experto a splica.
A cuminsa sinti escasez di gasolin na Caracas desde e siman aki. Ivan Freites, secretario general di Sindicato di Trahador Petrolero, a afirma den un entrevista concedi na El Nacional cu no tin reserva pa abastece henter e demanda di e pais.
E experto petrolero a indica cu dia 3 di november e unico planta catalitico di Amuay cu tabata opera ainda a keda paralisa. Esaki tabata produci un promedio anual di 35.000 pa 40.000 bari pa dia di combustible.
“Tur e plantanan di gasolin tabata paralisa caba, e planta catalitico di Amuay so tabata funciona ainda. Esaki a para luna pasa pa problema den algun ekipo y e parada aki por bay dura entre tres pa seis luna,” Freites a manifesta.
