E escasez di gasolin di siman pasa na Venezuela tabatin parcialmente como causa e incremento di exportacion di combustible pa aliadonan politico den region, manera Nicaragua y Cuba. Tambe un exodo di personal tecnico crucial pa mantene operacion di e instalacionnan di empresa estatal PDVSA. Esaki di acuerdo cu documento interno di pDVSA y fuentenan cu conoce e situacion operativo di e empresa.

Gobierno socialista di Venezuela ta bende su ciudadanonan e gasolin mas barata na mundo. Suministro di gasolin a sigui continuo apesar di un industria petrolero den crisis y un crisis economico profundisando cu a laga e pais aki cu reserva masha chikito di hopi necesidad basico.

Esey a cambia diarason siman pasa, ora Venezuelanonan a enfrenta nan prome escasez nacional di combustible pa vehiculo, desde cu un explosion a afecta un di e refinerianan mas grandi mundo cinco aña pasa. E tempo ey, presidente Chavez a corta suministro pa exportacion pa por continua cumpli cu su conciudadanonan.

E problema di suministro di e siman aki ta mayoritariamente producto di problema na e refinerianan, unda fayo y problema di mantenimento a corta produccion te mita. Contrario na cinco aña pasa, Caracas a continua cu exportacion na aliadonan politico y hasta a aumenta e volumen di cargamentonan durante ultimo luna, apesar di advertencianan for di paden di e compania estatal cu esaki por a causa un problema pa e suministro den e pais mes. Cargamento di refineria destina pa mercado local mester a ser redirigi pa cumpli cu e compromisonan inernacional aki, segun documentonan interno ta mustra.

“Si acaso e volumen adicional aki … ser exporta, esaki lo impacta un cargamento programa pa mercado interno,” un email ta bisa, cual a ser manda di un funcionario den e departamento di mercadeo local di e compania, pa e unidad di benta internacional. Venezuela luna pasa a exporta 88.000 bari pa dia di combustible – equivalente na un quinta parti di su consumo local – pa Cuba, Nicaragua y otro pais, di acuerdo cu documento interno di PDVSA cu Reuters a haya pa mira.

E orden pa incrementa exportacion a bin di top di PDVSA, di acuerdo cu email interno cu Reuters a mira. Venezuela su ministerio di petroleo y di PDVSA, no a contesta riba peticion di Reuters pa comentario riba e storia aki.