E “calma” a dura poco: desde diahuebs pasa habitantenan di Caracas a cuminza reporta cu nan no ta hayando acceso na pomp di gasolin, loke a ocasiona e formacion – atrobe – di filanan largo na e stacionnan di servicio di e capital.
A traves di red social Twitter, usuarionan a comparti video na varios zona di Caracas, mustrando fila kilometrico di vehiculo, sperando turno pa tuma combustible.
Dianan promer cu e regreso di e filanan, testimonionan duna na La Patilla, a sigura cu e schedule pa duna combustible segun cedula no ta ser tuma na serio mas pa autoridadnan, pa cual e fluho di vehiculo ta bay mas rapido.
Sin embargo e testigonan a expresa tambe cu segun e simannan ta pasa, e militarnan cu ta custodia e pompnan a cuminza ta exigi atrobe documento di identidad na chauffeurnan cu ta bin tuma gasolin, un accion cu ta indica cu gasolin ta cabando atrobe, y no ta duna esaki mas na cualkier cu ta presenta na e lugar.
Den estadonan Aragua y Carabobo e filanan pa gasolin subsidia ta kilometrico y si kier pasa menos tempo den fila mester paga cu dollar; asina mes ta tuma como cinco ora pa haya gasolin.
Director ehecutivo di Federacion Unitario di Trahadornan Petrolero di Venezuela (Futpv), Eudis Girot, a bisa diadomingo pasa cu e escasez di combustible na e pais ta pasobra “e gasolin di Iran a caba” y cu e refinerianan di e pais ta sigui fuera di operacion.
