(LaPatilla) – E perdida di balor di e moneda y di poder adkisitivo ta di un magnitud asina grandi, cu hortamentonan comun cu tabata afecta gran parti di e sociedad a perde logica, segun Observatorio Venezolano di Violencia. Asina a informa Voz de America.
Na 2017, e Observatorio Venezolano di Violencia (OVV) a reporta tiki mas di 26,616 homicidio, y na 2021, e cantidad aki a baha na un tiki mas di 11,082. E desaparicion di cierto oportunidad pa crimen cu tabata termina den resultadonan tatal ta un di e motibonan pa cual e Observatorio ta atribui e disminucion di e mortonan violento cu mas di 50 porciento den un periodo di 5 aña.
“Na Venezuela, a reduci e hortamentonan riba ATM, secuestronan express, hortamento di hende cu tabata bay lanta placa na ATM; bon, pasobra senciyamente loke por saca di un ATM ta ridiculo”, segun Roberto Briceño, director di OVV, a bisa na Voz de America.
E dificultadnan di transport publico na Venezuela, black out y empobrecimento di e famianan tin impacto riba e rutinanan di e ciudadanonan. Esnan cu ta comete delitonan comun ta enfrenta retonan mayor pa encontra potencial victimanan riba caya. 58 porciento di persona ya no ta sali anochi, y 64 porciento di esnan cu si ta sali, tin tiki placa cash, segun e informe di 2021 di e OVV.
Na un pais unda hende ta evita sali anochi y e placa local no tin mayor balor, e delincuentenan a bay pa otro tipo di delito cu nan ta considera mas lucrativo. “Na empresanan grandi, extorsion, empresanan cu ta maneha dollar, empresanan cu ta maneha divisa, empresanan cu ta maneha cantidadnan grandi, anto esey no ta afecta e ciudadano comun. Esey ta afectando un grupo. Anto e ciudadano comun ta sinti cu den su bario, violencia a desaparece”, Briceño ta sigura.
