Na Venezuela situacion di derecho economico, social y cultural a empeora dramaticamente na 2019, segun informe anual di Amnesty International, den cual ta reporta cu acceso na tur tipo di metodo anticonceptivo ta hopi limita y na algun ciudad hasta inexistente.
Den e informe mas reciente di Amnesty ta detaya e situacion di derecho humano riba e continente aki, y ta conclui cu desigualdad, corupcion, violencia, degradacion medio-ambiental, impunidad y debilitamento di institucion ta continua siendo un realidad habitual den henter e region, loke pa miles di persona ta traduci den violacion di derecho humano diariamente.
Nan ta pone enfasis riba vulneracion di derecho sexual y reproductivo destacando cu desde 2015, na Venezuela, embaraso na edad hoben a aumanta cu 65 %, loke ta afecta ademas e derecho di educacion di e mucha muhe, di acuerdo cu loke Oficina di Alto Comisionado di Nacionnan Uni pa Derecho Humano ta trece dilanti.
“Den cuadro di e emergencia humanitario, gobierno a sigui nenga di reconoce gravedad di e crisis y di acepta ayudo di e agencianan humanitario. Esaki a faborece aumento di e fluho di Venezolano pa paisnan bisiña pa por haya bienes basico. Incluso esaki a provoca cu hopi muhe a bandona e pais pa duna luz den otro teritorio.”
Pa Amnesty International, mortalidad materno tambe tabata motibo di preocupacion, ya cu nan ta dispone di informenan di morto ocasiona pa aborto den condicion di riesgo. Tambe na 2019 a continua e alarmante escasez di servicio di salud y medicamento basico, como tambe e exodo di personal asistencial, e informe ta bisa. E interupcion di coriente cada vez mas frecuente y mas largo, a causa daño ireparable na infrastructura y servicio di salud. Encuesta Nacional di Hospital ta señala cu entre november 2018 y februari 2019, 1557 persona a fayece como consecuencia di falta di suministro den e hospitalnan.
