E encargado di asunto di embahada di Estadonan Uni, James Store, a laga un carta atras riba su escritorio na momento di bandona e edificio hunto cu e ultimo diplomaticonan Mericano presente ainda.
Esaki ta un bonbini o un ‘kico bo ta haci den mi oficina?’ asina e carta ta cuminsa cu el a laga atras, den cual e ta sigura cu e tin e optimismo cu democracia ta na alcance di e Venezolanonan.
“Esaki lo ta un retraso minimo den loke lo ta e victoria pa pueblo di Venezuela,” e ta sigura den e carta.
Di e mesun forma, den un video difundi pa embahada di Estadonan Uni na Venezuela via Youtube, Store a critica e accionnan di Nicolas Maduro y a sigura cu no tin democracia na e pais.
“Con nan por papia di democracia ora sistematicamente nan ta viola Constitucion, ta prohibi partido politico, ta encarcela lider opositor y ta ataca ken cu ta cu tribi di lanta voz contra nan?”, e ta puntra. Tambe el a señala cu e ta apoya e Venezolanonan cu ta soña cu un Venezuela liber y prospero.
‘Venezolanonan, mi sa cu boso ta keda fuerte y comprometi cu e cambio, pasobra sí por. Boso ta na e banda corecto di historia,” el a bisa.
Ademas, el a exhorta e poblacion pa apoya e presidente interino di Venezuela, Juan Guaido, y su ekipo. “Mi ta urgi tur empleado publico pa pensa si awe nan bida ta miho o pio cu antes, si e menasanan di e colectivonan ta e forma di defende Constitucion y e ciudadanonan”, el a añadi.
Embahada di Estadonan Uni na Venezuela tambe a emiti un comunicado, den cual ta sigura cu e personal diplomatico pronto lo bolbe “na un Venezuela liber y democratico.”
