(AP) — E lider di oposicion Venezolano kende a declara cu a derota presidente Nicolas Maduro den eleccion presidencial aña pasa, a reuni cu presidente Mericano, Joe Biden ayera.
Reunion di Biden den Cas Blanco cu Edmundo Gonzalez, kende a representa e coalicion principal di oposicion Venezolano den eleccion presidencial na juli, a tuma lugar mientras e diplomatico retira ta purba di rally sosten pa su esfuerso pa saca Maduro di su cargo prome cu diabierna, na momento cu pa ley, e proximo termino presidencial di e pais Sur Americano ta cuminsa.
“Nos tabatin un combersacion largo, fructifero y cordial cu presidente Biden y su team,” Gonzalez a bisa reporteronan. “Nos, obviamente, a gradici gobierno Mericano pa e sosten cu a duna nos den e bataya aki pa recuperacion democratico na Venezuela. Esey ta un compromiso cu nos ta hiba cu nos y cu nos ta bay continua sigui te ultimo dia di gobierno di e presidente.”
Gonzalez a cuminsa un tour di continente Americano diasabra, cu parada na Argentina y Uruguay. Su campaña a haci un yamado pa Venezolanonan bibando den area di Washington reuni dialuna pafo di oficina di Organisacion di Estado Americano (OEA).
Mientras tanto, Maduro ya a ricibi un invitacion di Asamblea Nacional pa su huramentacion pa un di tres termino di seis aña diabierna, mas cu cinco luna despues cu Conseho Nacional Electoral, yen di hende leal na e partido den gobierno, a declar’e ganador di eleccion dia 28 di juli.
Merca y mayoria di gobierno Europeo a rechasa e resultado oficial di eleccion y ta considera Gonzalez e ganador legitimo.
Contestando ayera tocante plannan di Gonzalez, minister di Interior Venezolano, Diosdado Cabello a insulta e politico, a ataca su credibilidad y a menas’e cu aresto. E tambe a insisti cu ta bay huramenta Maduro riba diabierna.
“Cobarde,” Cabello a bisa referiendo na e diplomatico retira, kende el a acusa, sin duna prueba, di ta un agente di CIA. “E no tin ni curashi ni disposicion… Sr. Gonzalez Urrutia sa cu asina cu e pone pia na Venezuela, ta bay arest’e.
Gonzalez, kende a representa e coalicion Plataforma Unitario, a bandona Venezuela pa exilio na Spaña na september, despues cu un hues a emiti un orden pa su aresto en conexion cu un investigacion riba publicacion di actanan di votacion di eleccion. Siman pasa, gobierno a anuncia un recompensa di $100mil pa informacion riba paradero di Gonzalez.
Ayera, Gonzalez tambe a bisa reporteronan cu su campaña ta den contacto cu team di presidente electo di Merca, Donald Trump.
Den simannan recien, Gonzalez a priminti di biaha pa Venezuela pa su huramentacion pa e termino presidencial, pero e no a splica su plan pa bolbe of ranca poder for di Maduro, kende su partido ta controla tur institucion y ehercito.
Diadomingo, Gonzalez a dirigi palabra na forsanan arma Venezolano den un video riba rednan social, recordando nan cu segun Constitucion, e “mester asumi e rol di hefe comandante” riba diabierna, y cu nan ta “yama pa garantisa e soberania y respet pa boluntad popular.”
Pero minister di Defensa, Vladimir Padrino dialuna a bisa cu e forsanan arma ta bay reconoce Maduro como presidente riba Dia di Inauguracion. “Nos ta rechasa categoricamente y cu vehemencia absoluto e acto ridiculo aki di politikeria, cu no ta bay tin e mas minimo impacto riba e consenshi patriotico robusto di (forsanan arma Venezolano),” Padrino a bisa den un discurso nacional riba television estatal.
