“Mi a paga gasolin cu un habon.” Asina simple. Imagina e escena di yega na un stacion di gasolin y bo no tin niun cen pa yena tanki di bo auto. Imagina anto cu bo ta na un ciudad, den otro pais, pafo di Venezuela y cu e situacion aki bo por resolve cu un trueque. Lo ta posibel? Bo por keda sin paga e gasolin cu placa? Bo por ofrece un habon a cambio di 40 litro di gasolin? Ata e storia aki, di un periodista stranhero.
E meter di e auto ta indica cu e tanki tin un poco menos di un cuarto aden; nos ta na Maracay, na mas di 100 kilometro di Caracas y nos mester sigui cu e biahe. Nos ta drenta na un stacion di gasolin y tabatin combustibel. Prome logro den e Venezuela di escasez aki. Acto sigui nos ta ripara cu nos no tin ni un solo biyete pa paga cune. Cu e necesidad di cumpra gasolin nos ta dicidi ofrece e señor, cu tabata atende na e pomp, un trueque. Gasolin a cambio di un habon pa baño.
“Señor, bon tardi, nos no tin ni un bolivar. Nos por paga cu un habon?,” a puntra e persona. E homber a acepta y sin warda a cuminsa pone gasolin den e tanki.
“Cualkier cos cu nan duna mi ta bon,” e homber a bisa. Y si, e prijs di e producto ey cu a ofrece ta casi igual na loke e ta gana den un luna largo di guli gas toxico na su trabao.
Mientras e pomp tabata traha, nos a saca un habon marca Palmolive y a entrega esaki na e homber. Purba imagina su cara mirando e producto ey, asina costoso, y dificil pa haya. “Danki, masha danki,” e homber a bisa cu un sonrisa grandi.
Asina leu e ‘distorcion’ tipico socialista di prijsnan ta bay, cu un habon di un par di florin ta ekivalente na 40 litro di gasolin, aki facilmente alrededor di 80 florin. Esaki ta hiperinflacion den revolucion socialista.
