Economia Venezolano a registra un caida di 39,21% na ciere di prome tres luna di 2019, compara cu e mesun periodo di 2018. Esaki ta significa un contraccion riba base anual di 39,9%, segun e Indice di Actividad Economico cu Asamblea Nacional ta presenta.
Entre e prome trimester di 2013 y e mesun periodo di 2019, e indicador produci pa parlamento ta indica cu actividad economico a keda reduci na 63,4%, segun diputado Angel Alvarado.
Pa duna un idea di e gravedad di e depresion economico nacional, Parlamento a recuri na e lista di e collapsenan economico mas grandi di historia contemporaneo, y por observa cu Venezuela ta na puesto number 5. Na prome luga ta ainda Liberia, cu a haya un recesion economico na 1980 cu a acumula un caida di ‘PIB’ (GDP) di 91,7%.
Na di dos luga ta aparece Georgia cu a acumula un contraccion di 78,6% desde 1986; Tadjikistan, cu un caida di 70,6% desde 1989; y Irak cu a toca fondo cu un perdida di 64% di GDP desde 1991. Tur e otro paisnan aki, sin embargo, a experimenta e caida den tempo di guera.
Tur e analisisnan disponibel ta coincidi cu e aña aki economia lo registra un caida di por lo menos 30%. E caida fuerte na inicio di e aña aki ta relaciona cu entre otro e consecuencianan di e blackoutnan grandi na maart, cu tabatin consecuencia tambe pa produccion y exportacion di petroleo, ademas di e efectonan den tur sector economico pa motibo di falta di electricidad.
