(LaPatilla/) – Nicolas Maduro a responde positivamente riba peticion di su homologo nobo di Colombia, Gustavo Petro, pa ta “garante di paz” den negociacion entre gobierno Colombiano y e grupo guerrillero Colombiano ELN.
Sin embargo, coordinadora di e organizacion Fundaredes, Clara Ramirez, ta recorda cu e guerrille aki ta esun cu desde hopi aña tin control di e espacio radio-electrico cu diferente emisora radial den teritorio Venezolano, y tambe ta tene actividad di indoctrinamento, training di arma y ta participa den mineria ilegal, specialmente den e zonanan di frontera cu Colombia.
Fundaredes tin varios aña denunciando e actividadnan ilegal y di violacion di teritorio nacional, sin cu gobierno Chavista ta tuma paso contra e organizacion Colombiano.
Como tal, Ramirez ta haya cu gobierno di Venezuela no tin e capacidad di ta imparcial den un negociacion di paz cu e grupo arma aki. Ramirez ta considera cu na e ocasion aki tin duda cu e guerrilla ta bay para nan violencia na Venezuela, pasobra gobierno Venezolano no a reconoce presencia di ELN y di disidencia di Farc den nan teritorio nacional. Por lo tanto e pregunta: Y kico ta pasa cu paz na Venezuela?
Fundaredes su denuncia contra operacion di ELN den teritorio Venezolano a conduci na privacion di libertad di su director, profesor Javier Tarazona. Fundaredes a specifica den varios estudio cu ELN tin presencia den e principal estadonan di Venezuela y ta conduci actividad manera homicidio, trabao forzoso, contrabanda, narcotrafico, cultivo di droga y pista clandestino di aviacion. Tambe a señala cu ELN a causa desplazamento forza di gruponan vulnerable na varios estado, y tambe ta participa den extorsion, secuestro, trafico di persona, hasta nan a tene reunion di control politico, apropiacion di tera, reclutamento di menor y algun guerrillero tabata autor di abuso sexual.
