Un hoben studiante di e Instituto Pedagogico Rural “Gervasio Rubio” (UPEL) den sector Rubio, municipio Junín, di estado Táchira, a ser asesina durante un manifestacion. E mucha homber a haya un tiro di baladen su cara presuntamente di un civil arma, a bordo di un motorcycle, den e zona conoci como ‘La Ye’. E fayecido a keda identifica como José Gregorio Pérez Pérez, di 19 aña, y tabata studiante di kinto semester di Educacion Fisico na UPEL. Den oranan di mainta tabatin un protesta di e studiantenan di UPEL pa falta di gas y cu a hiba na e accion di blokeo di caminda.
Banda di esaki, durante un manifestacion di protesta contra gobierno di presidente Nicolas Maduro ayera mainta tabatin otro morto di lamenta. E suceso a tuma luga dilanti di e instalacion di Universidad Rafael Belloso Chacín (URBE), na estado Zulia, unda e manifestacion tabata den proceso.
Laura Valbuena, coordinador di Foro Penal Venezolano den e estado occidental, a indica cu e victima a keda trapa pa un pickup cu tabata transporta material medico. E victima tabata yama Luis Enrique Vera Sulbarán, di 20 aña d edad y tabata studia Administracion.
Valbuena a splica cu e conductor a bira nervioso ora el a bay pasa de baricadanan, ya cu e manifestantenan kier a kita e vehiculo di dje. “Aparentemente e mucha homber (e chauffeur) a desespera, a acelera y no a ripara cu el a dal e studiante,” el a grega.
E personanan cu tabata protestando a kima e pickup. Algun minuut despues a yega funcionarionan di polis di estado Zulia y di Cuerpo di Investigacion Cientifico, Penal y Criminalistico.
Den URBE a suspende actividad pa duelo pa morto di Vera Sulbarán.
