Dos persona di nacionalidad Venezolano a keda aresta na Fort Lauderdale Executive Airport diabierna pasa, tratando di drenta e pais cu oro valora na US$ 5 miyon. E oro tabata scondi den nanishi di e avion priva cu cual nan a yega procedente di Caracas. E noticia a bira conoci dialuna pasa ora cu a deposita e documentonan corespondiente di e caso na autoridadnan hudicial federal.
Pasahero Jean Carlos Sanchez Rojas y piloto Victor Fossi Grieco a keda aresta despues cu agentenan di U.S. Customs & Border Protection a mira cu tabatin parti di e nanishi no tabata bon pega y a haya sospecho. E oro a resulta scondi bao di un panel di metal den e nanishi.
E arestonan lo por yuda den un investigacion mas amplio na Merca encuanto oro cu ta drenta di contrabanda di Venezuela y ta sospecha cu e beneficionan ta pa e regimen di Nicolas Maduro, cu tin bastante problema pa yega na divisa.
Despues di su detencion Sanchez Rojas, di 41 aña di edad, a conta agentenan federal cu el a obtene e oro di ‘multiple fuente’ na Venezuela y tabatin planea pa bende esaki na Merca, di acuerdo cu e acusacion. El a declara cu e ta traha pa un ‘organisacion cu a yega di trece oro Merca prome caba’. E tabata pendiente di haya pago pa su trabao. Fossi Grieco, di 51 aña, a bisa cu el a topa cu hende na Venezuela pa recoge e oro y a pone den nanishi di e avion dos dia prome cu el a bula pa Fort Lauderdale. E carga di oro 230 liber (104 kilo), segun e agentenan federal.
