Un ex-representante di benta y e presidente di un compania cu sede na Merca a ser aresta diamars pa nan supuesto papel den un plan pa sigura di forma corupto e bentahanan comercial di e compania estatal Pdvsa. E beneficionan comercial tabata inclui e otorgamento di contrato y e pago di factura venci, segun departamento di Husticia di Estadonan Uni.
Fiscal Ryan K. Patrick, fiscal general adhunto Brian A. Benczkowski di departamento di Husticia y agente special Mark Dawson, a haci e anuncio.
Rafael Enrique Pinto Franceschi, di 40 aña di edad, di Miami, Florida, y Franz Herman Muller Huber, 68 aña, di Weston, Florida, a keda aresta na Miami despues di orden di aresto pa cinco acusacion na Distrito Sur di Texas (SDTX) di 21 di februari. Pinto y Muller ta acusa di viola e ley di Practica Corupto den Exterior (FCPA) y labamento di placa, entre otro.
Pinto tabata un representante di benta pa un proveedor di Pdvsa na Miami (“Compania A” den e acusacion), mientras cu Muller tabata presidente di Compania A. Pinto y Muller desde 2009 y te al menos 2013 a conspira cu otronan pa soborna tres funcionario di Pdvsa a cambio di brinda asistencia relaciona cu e negoshi di Pdvsa cu compania A, pa logra haya contrato cu Pdvsa.
En total, ta alega cu Pinto a ricibi mas di $ 985.000 na pago di soborno y Muller mas di $ 258.000. Dos acusado empleado di Pdvsa, Jose Camacho y Ivan Guedez, ambos di Houston, ya a declara culpable relaciona cu e caso y ta pendiente di sentencia.
