Dos di e dirigentenan di Citgo cu a keda preso na Venezuela despues cu a yama nan pa un reunion na Caracas mas di dos aña atras. Esaki a traves di e mediacion di e ex-gobernador Mericano Bill Richardson, cu a bin Venezuela pa negocia cu regimen di Nicolas Maduro na fabor di e presonan aki, cu tin nacionalidad Mericano tambe.
E dos ehecutivonan cu a keda bao aresto domiciliario ta Gustavo Cardenas y Jorge Toledo, segun e ex-gobernador. Gobierno di Maduro a opta pa no duna comentario di inmediato. Di e grupo forma pa seis ehecutivo di Citgo ta keda awor ainda preso cuatro di nan riba cual no tin ainda ningun novedad.
“Esaki ta un promer paso positivo y importante,” Richardson a bisa den un comunicado den cual el a gradici Nicolas Maduro pa sigui involucra den e dialogo cu a cuminza na inicio di e luna aki. E otro cuatro ehecutivonan preso ta Tomeu Vadell, Jose Luis Zambrano, Alirio Zambrano y Jose Pereira. Richardson ta dirigi un centro cu ta traha pa liberacion di ciudadano Mericano preso na henter mundo.
Maria Elena Cardenas, cu ta biba cerca di Houston, a bisa cu e ta sinti su mes alivia ora el a tende di e traslado di su esposo y cu e ta buscando desesperadamente un lugar pa keda ya cu e famia no tin cas na Caracas.
E seis personanan ta ser acusa pa e regimen Chavista di corupcion pa un supuesto plan pa refinancia como 4.000 miyon dollar den bono di Citgo ofreciendo un participacion di 50% den e empresa como garantia. Fiscalia ta acusa di maniobra pa beneficia personalmente di e propuesta ey.
