Dos di e cuatro mehoradornan (upgrader) di crudo di Venezuela, necesario pa converti e petroleo extrapisa di e Faha di Orinoco den un producto mas comercial, a keda paralisa ainda, mas di un luna despues di un blackout grandi, segun un documento cu agencia Reuters a haya pa mira diasabra pasa.
E empresa petrolero estatal Pdvsa, sin embargo, a aumenta su produccion di crudo mehora te 313.000 bari dia 2 di mei y te 326.000 bari dia 3 di mei, compara cu e 298.000 bari pa dia na inicio di april.
Di acuerdo cu e documento, e produccion di e dos otro upgradernan y di e empresa mixto Sinovensa, un joint venture cu CNPC di China, loke ta sugeri cu a acerca o surpasa expectativa.
Produccion di crudo di e nacion miembro di OPEC, un elemento vital di su economia, a cay e aña aki a causa di un ola di blackout y e sancionnan Mericano contra Pdvsa. A pesar di e aumento actual, produccion total di e mehoradornan a keda bastante bao di nan capacidad combina di alrededor di 700.000 bari pa dia (bpd).
Un documento di Pdvsa cu Reuters a mira luna pasa tabata mustra cu e compania no tabata anticipa cu e proyectonan lo a aumenta produccion na april.
Un di e empresanan paralisa ta Petromonagas, un joint venture cu Rosneft di Rusia, cu ta para pa trabao di “limpiesa y reparacion”. Tambe ta para actualmente Petro San Felix, propiedad di Pdvsa.
Petrocedeño, un empresa conhunto entre Pdvsa y e compania Frances Total y Equinor, di Noruega, tabata produciendo 71.000 bpd, 99% di su produccion planifica.
Segun e documento, Petropiar, den cual e empresa Mericano Chevron ta participa como socio minoritario, ta produciendo alrededor di 130.000 bari a dia na inicio di mei. Sinovensa tabata produci 117.000 bpd, 88% di loke ta planea.
