(ElNacional/VOA) – E dollar paralelo na Venezuela a pasa e barera di 11 bolivar pa un. E prijs ey por sigui aumenta, segun expertonan, cu ta pronostica cu e tendencia pa bay mas halto ta keda y lo provoca un inflacion mas fuerte ainda pa fin di aña.
Mientras tanto Banco Central di Venezuela a mantene e tasa oficial na 9,29 bolivar, na momento cu siman pasa caba e dollar paralelo a pasa e marca di 10 bolivar. Den economia informal y den varios sector formal tambe, manera comercio y empresanan minorista, ta sigui e dollar paralelo, aunke esey no ta permiti.
Gobierno Chavista ta mira e dollar riba mercado “preto” como hueso di lomba di un “guera economico” impulsa pa factornan externo contra nan pais. Sin embargo, e ascenso di e tipo di cambio paralelo na e pais ta tumando lugar den un contexto unda no tin abundancia di divisa; e reservanan internacional ta na un minimo historico y aunke e hiperinflacion di ultimo añanan a mengua, e aña aki inflacion a cuminza aumenta atrobe, segun economista Hermes Perez den conversacion cu Voice of America. Segun investigacion di Perez, prijsnan di producto, bienes y servicio a triplica desde mei e aña aki, compara cu e periodo januari pa april.
Perez, profesor di Universidad Metropolitana, y ultimo hefe di mesa di cambio di BCV y academico specializa den macroeconomia y petroleo, ta subraya cu e rebrote inflacionario observa desde mei a impacta e prijs di e divisa, y ta impulsando su ascenso. “Asina ta perpetua e eterno ciclo vicioso: Prijsnan ta subi, tasa di cambio ta aumenta, y esaki ta impulsa e alza di prijs,” segun e experto.
Perez ta pronostica cu e tasa di cambio ta keda subi den e ultimo dos luna di aña, pa e aumento di prijs pa motibo di temporada, mas liquidez pa Pasco, y e fracaso pa contene inflacion di parti di estado.
