(LaPatilla/AFP) – Un hoben ta empaqueta compra y ta hiba nan na auto di e clientean na un supermercado na Caracas. Mayoria ta paga e propina cu hariña di maishi, grano o producto den bleki. “Mi no tin efectivo,” ta loke nan ta bisa.
Nan ta paga cu cuminda pasobra ta practicamente imposible di duna un tip cu biyete di bolivar, e moneda local pulveriza pa hiperinflacion (400.000% na 2018 so) y awor na mas di 2,5 miyon pa un dollar, ta keda reemplaza pa dollar Mericano.
Circulacion di e biyete berde, simbolo di “imperialismo Mericano” y considera un enemigo di e “revolucion Boliviariano”, a cuminza bira di general presencia na 2019 y gobierno di Nicolas Maduro mester a haci manera nan no ta mira y a acepta su uso, cu a bira normal.
Desde bendedor riba caya te na comerciante formal, nan ta maneha dollar, algo curioso den e pais aki golpea pa sancion Mericano, como parti di e strategia encabeza pa lider opositor Juan Guaido pa forza Maduro for di poder.
“E ta hopi paradohico,”ministro di Exterior, Jorge Arreaza, ta admiti den un entrevista reciente cu AFP. “Pero nos no por lubida cu nos ta den e area geopolitico di Merca, cu ta e principal socio comercial di tur nos paisnan” na America Latino. “En vista di e bloqueo nos mester a flexibiliza, nos a siña di e hendenan cu a cuminza usa dollar(…), nos mester a acepta e realidad ey y facilita e proceso,” el a indica.
E dollar a bira e moneda dominante; liquidez na bolivar ta di 466 miyon (dollar), equivalente na 18 dollar pa habitante, segun economista Asdrubal Oliveros, di firma Econoanalitica. En cambio, liquidez total na dollar ta na 2.300 miyon, y 60% di e recursonan capta pa banco, ta na dollar.
