E moneda Venezolano ta manera dirti bao di e incesante incremento di prijsnan y un proceso ‘de facto’ ta tumando luga unda e dollar Mericano ta imponiendo den e transaccionnan diario, segun un informe di e medio infobae.com.

E emblema di capitalismo ta avansando rapidamente den comercio di e supuesto modelo di ‘Socialismo di Siglo XXI’. Di acuerdo cu un estudio di e firma Ecoanalitica, elabora durante e dos ultimo simannan di april na e shete ciudadnan mas pobla, e Venezolanonan ta uza dollar pa paga 93% di e biahanan cu nan ta cumpra ekipo electronico, celular y computer; 84% di e biahanan cu nan ta cumpra aparato electrico pa hogar y 72% ora nan ta cumpra piesa pa auto.

Pafo di comercio tambe presencia di e moneda Mericano a expande. Alfredo Martinez ta odontologo, y manera mayoria di su coleganan, el a fiha prijs pa su consulta y tratamentonan na dollar:” Pa un limpiesa mi ta cobra 35 dollar, o su ekivalente na tipo di cambio di dia; si mi mester cobra na bolivar, mi mester ahusta prijs tur dia. Ademas, e huur di e local y tur e materialnan cu mi ta uza pa traha, mi mester paga na dollar.”

E dollar a converti den e referencia pa establece tarifa y realisa pago danki na e hiperinflacion cu a destrui e moneda Venezolano: E estadisticonan di Banco Central a registra entre april 2018 y april di e aña aki cu prijsnan a aumenta cu 283.000% y e biyete di mayor denominacion, di 50.000 bolivar, apenas ta yega pa cumpra un kilo di carni.

Economistanan ta di acuerdo cu e hiperinflacion ta causa pa un gobierno den bancarota cu ta acudi na creacion di placa pa paga salario, pension y cubri gasto di tur tipo. Na paisnan cu a sufri hiperinflacion manera Zimbabwe, e dolarisacion a sirbi pa para e inflacion pasobra e dollar a substitui e moneda local y gobierno a perde e facultad di emiti mas placa, pero esaki no ta e caso na Venezuela.

Asdrubal Oliveros, director di Ecoanalitica, ta afirma “e hiperinflacion ta continua pasobra gobierno ta sigui emiti placa pa financia su mes; nos ta den e mundo pio: Hiperinflacion ta keda. Tin un dolarisacion, pero informal; no uno adopta pa autoridadnan.”