(ElNacional) – Cleimer Gustavo Hostos Lopez y Jean Araujo, relaciona cu e empresa di importacion di medicamento Global Medical Supply, ta exigi e Ministerio Publico (MP) continua cu e investigacionnan pa loke ta trata e caso di benta cu prijsnan halto di medicamentonan cu tabata yega e pais den nomber di su compania, y cu tabata wordo realisa pa personanan cu no ta traha pa e compania.
Nan ta sigura cu ta trata di un estafa cu ta perhudicanan directamente y nan ta pidi pa haci husticia. E involucradonan den e hecho ta Carlos Gustavo Musso, Carlos Eduardo Hostos Musso y Oscar Alberto Bohorquez Leon.
Segun e relato di Hostos Lopez, ken ta ruman di e dos implicadonan, e tres suhetonan aki a crea un empresa falso, cual nan a yama Global Care Pharma. Pa medio di esaki, nan tabata importa e medicamentonan cu nan tabata adkiri cu licencia di e empresa original, Global Medical Supply.
Hostos Lopez a expresa cu, como socio di e compania e ta directamente afecta pa e actonan di su conocirnan. Den e sentido aki el a splica cu Global Care Pharma ta un empresa paralelo cu a wordo crea di manera clandestino.
Na momento cu e y su socionan a tuma nota cu tabatin iregularidadnan den e operacionnan di Global Medical Supply, nan a dicidi di hiba e caso dilanti husticia.
“Nos ta pidi un revision di cuenta dilanti un tribunal, ademas di un fiscalisacion di parti di Seniat. Tambe nos a acudi na Ministerio Publico pa habri un procedimento, pasobra nos no por a compronde con, si nos tabata importando, nos no tabatin benta,” el a splica.
