Diosdado Cabello, presidente di e asamblea nacional constituyente, a sigura ayera cu nan ta bay haci e convocatorio di eleccion parlamentario.
“Claro cu nos ta bay convoca esaki,” Cabello a bisa na e Palacio Legislativo. E lider di e asamblea constituyente, no reconoci internacionalmente como legitimo, a bisa cu e convocatorio por a sali ayera mes.
Ayera tardi Henry Ramos Allup, diputado di e Asamblea Nacional (AN), si reconoci como unico organo estatal legitimo, a adverti di e posibilidad cu e parlamento autentico por ser invadi y ocupa militarmente, riba orden di e partido den gobierno, Partido Socialista Unido de Venezuela (PSUV).
Ramos Allup a bisa tambe cu e decision di Nicolas Maduro di convoca eleccion parlamentario ta un acto di desespero. El a sigura tambe cu Juan Guaido, presidente interino di Venezuela, ta conta cu respaldo di e pais.
“Nos a maneha e proceso aki cu hopi inteligencia y mi ta reconoce cu abo, compañero presidente Guaido, cu bo noa laga nan pusha bo y cu bo tabata hopi prudente y pesey por conta cu e respaldo di e pais y di nos,” Allup a bisa den e sesion ordinario di e Asamblea. E parlamentario a resalta cu Nicolas Maduro a lansa e idea di realisa eleccion parlamentario a pesar cu e periodo legislativo ta vigente.
