E ciudadano Venezolano a pasa di come un promedio di 21 kilo di carni pa aña pa solamente 3, un di e cifranan mas abao na mundo.
E Confederacion Venezolano di Industrial a adverti pa e dramatico caida di e demanda, pa motibo di e crisis economico cu a destrui entrada di persona cu salario, relaciona cu e aumento di costo di produccion den sector ganadero.
E consumo di carni na Venezuela a pasa pa un di esunnan mas abao na mundo, na tres kilo pa persona pa aña, apenas 14% di e cifra registra na 2016, impulsa pa e caida fuerte di demanda.
Segun Adan Celis, presidente di Conindustria, e sector ganadero ta gravemente afecta pa diferente angulo di e crisis economico, manera e aumento di costo (falta di combustibel, aumento di prijs di material y problema di insiguridad), loke ta complica produccion.
“Pero e problema mas grave ta e caida di demanda, e destruccion di entrada di e Venezolano,” el a sigura den entrevista cu Union Radio. Celis no a aclara si e ta referi na consumo di carni en general o solamente na carni di baca. Di tur manera e ta un cifra abao compara cu resto di mundo.
Argentina, un di e paisnan unda ta consumi mas carni den e region, y cu tabatin un reduccion den ultimo añanan, tin un cifra casi 16 biaha mas halto den carni di baca, cu 49,6 kilo pa persona, segun datonan di Camara di Industria y Comercio di Carni y Derivado.
E tres kilo anual di Venezuela ta un minimo pa e paisnan di Occidente y similar na e paisnan mas pober di planeta. A base di datonan di FAO, actualisa te cu 2013 y incluyendo tur tipo di carni, e promedio registra na Etiopia ta 7 kilo; na Ruanda 8 kilo.
