E prome vice-presidente di Asamblea Nacional, Edgar Zambrano, a keda deteni diarason pasa pa agentenan di servicio di inteligencia nacional Sebin.

E parlamentario a menciona e suceso riba su cuenta di Twitter mientras un grua a hiba su auto, cune aden, pa e sede di Sebin den e edificio conoci como El Helicoide.

“Nos a keda sorprendi pa SEBIN, y ora nos a nenga di sali di nos vehiculo, nan a usa un grua pa traslada nos pa El Helicoide. Anos democrata ta keda den lucha,” el e skirbi.

E aresto di Zambrano a tuma lugar despues cu e asamblea nacional constituyente, institui via eleccion ilegitimo pa regimen di Maduro, a dicidi di kita proteccion parlamentario di varios miembro, entre nan Zambrano.

Diputado di Asamblea Nacional y miembro di Fraccion 16 de Julio, Richard Blanco, a pidi proteccion den calidad di huesped den embahada di Argentina na Caracas ayera, despues di e decision ilegitimo di asamblea constituyente contra su persona.

E segundo vice-presidente di Asamblea Nacional, Stalin Gonzalez, a comenta e detencion di su compañero Zambrano di e hunta directivo di parlamento, sigurando cu esnan cu awe ta usurpa poder na Venezuela ta caba cu constitucion.

Estadonan Uni a califica e detencion di Zambrano como arbitrario. Departamento di Estado a indica cu si no yega na liberacion inmediato di e parlamentario, lo tin consecuencia, aunke no a detaya cual nan lo ta. Tambe a declara cu Nicolas Maduro y su complicenan ta e responsablenan pa e integridad fisico di Zambrano. E condena di Estadonan Uni di e detencion di e parlamentario a bin hunto cu declaracion similar di Chile, Colombia y Peru.

Oficina di derecho humano di Orgnisacion di Nacionnan Uni (ONU), dirigi pa ex-presidente Chileno Michelle Bachelet, a exigi e inmediato liberacion di Zambrano y ta exigi tambe termina tur persecucion contra miembronan di Asamblea Nacional.

E Grupo di Contacto, entre otro integra pa varios pais Europeo, a condena e aresto di Zambrano tambe y ta exigi su liberacion.

Juan Guaido a reacciona condenando e aresto, y a comenta cu ta e, Guaido, tabata lidera e accion Operacion Libertad. “Pakico anto aresta Zambrano?”