E nutricionista Susana Raffalli, di Caritas Venezuela, a sigura cu Venezuela por cera aña cu mas di 15% di desnutricion infantil severo. Aña 2018 a cera cu 7% di desnutricion infantil severo.
Ademas, el a conta cu e situacion ta birando mas grave pasobra entre e poblacion desnutri, por lo menos 21% di e pacientnan ta haya enfermedad infeccioso, cu peligro pa nan bida.
El a lamenta cu Caritas tin añanan largo ta captando, ubicando y distribuyendo tur ayudo humanitario cu ta yega di exterior pa atende e casonan di desnutricion den henter e pais, y sin embargo e cifranan ta sigui aumenta.
Segun e datonan cu e institucion ta maneha, e cantidad mas grandi di caso di desnutricion ta na La Guaira, Machiques de Perijá (Zulia) y na estado Bolivar.
“Nos ta preocupa pasobra nos tin tres aña den esaki, trahando sin interupcion y nos personal ta bira cansa. Ohala nos por mira un mehoracion pronto,” el a expresa.
Di otro banda, el a califica di positivo e esfuersonan di Caritas Venezuela pa yega na aliansa internacional cu por amplia nan capacidad di atencion.
E activista a conta cu actualmente nan ta traha hunto cu Organisacion Panamericano di Salud, Unicef y Acnur. Sin embargo, Venezuela mester competi pa fondo humanitario den un contexto global den cual tin pais sufriendo igual o mas ainda pa varios razon. Pa e cambio di clima y secura, emergencia natural, y e paisnan cu tin guera declara, segun Raffalli. Ademas, gobierno Venezolano no a permiti e organisacionnan internacional move cu libertad den henter e pais pa studia e situacion directamente.
