Venezuela a registra e luna di october aki un inflacion di 50,6 %, comara cu e luna anterior, drentando tecnicamente den hiperinflacion sobrepasando pa prome biaha den su historia e limite di 50 % cu ta defini e concepto aki.

Asina e conocido firma di asesoria economico y financiero Econométrica, cu hunto cu Parlamento -den man di oposicion- y otro entidadnan priva ta ofrece periodicamente un calculo di e inflacion den e pais, en vista di ausencia di dato publico di parti di Banco Central.

“Cu e inflacion general di october 2017 (50,6 % compara cu september 2017), Venezuela ta drenta den e definicion tecnico di hiperinflacion segun e modelo di Philip Cagan,” un mensahe riba cuenta di Twitter di Econométrica ta bisa, cu ta haci referencia na e economista Mericano cu a desaroya e concepto na 1956.

Econométrica ta papia di un “maximo historico” di inflacion den historia di e nacion petrolero, cu ta atravesa un crisis grave humanitario, marca pa escasez y prijs halto pa producto basico manera alimento o medicamento.

Fuentenan di e firma consulta pa EFE a splica cu Venezuela tin varios aña ta creando e condicionnan cu ta hiba habitualmente na hiperinflacion, entre nan ta destaca e emision descontrola di placa di parti di Banco Central y e falta di bienes den mercado a causa di e caida di produccion.

Un dia prome cu a divulga e datonan cu ta ta indica e situacion na Venezuela, presidente Nicolás Maduro a anuncia e di cinco aumento di salario minimo di e aña aki y number 39 desde cu na 1999 e Revolucion Bolivariano a cuminsa.

Cu e incremento di diarason pasa, e salario minimo mensual di e Venezolanonan ta stipula na 177.507 bolivar, equivalente na 53 dollar segun e tasa di cambio oficial di referencia (3.345 bolivar pa dollar) cu ta keda na poco mas di 4 dollar na tipo di cambio riba mercado paralelo.

“Esaki no ta aumento berdadero di salario sino cambio nominal cu cual no por cumpra producto,” e presidente di e Comision di Finanzas di Parlamento, e economista José Guerra, a bisa, cu a añadi cu e incrementonan aki ta pa “paga candela cu gasolin di avion.”

Venezuela ta sufri ademas di escasez di biyete,loke ta obliga e ciudadanonan pa haci rij largo na e ATMnan pa saca e poco efectivo cu e banconan ta ricibi.

Ta anticipa cu e aumento di salario lo causa un otro salto den e prijs di dollar compara cu e bolivar, loke ta sigui aumenta e spiral inflacionario.