E prome vice presidente di Asamblea Nacional, Freddy Guevara a sigura ayera cu durante Semana Santa lo tin actividad riba caya.
“Si lo ti caya den Semana Santa! Mañan 10 di april nos ta tuma di nobo henter Venezuela. Resistencia pacifico!”, el a skirbi riba su cuenta di Twitter, pidiendo apoyo den e difusion debido den cual tabata nota cierto confusion.
Pa awe dialuna, tin convoca un mobilisacion, mientras cu diamars y diaranson lo realisa e jornada nacional di recolecta firma pa respalda e solicitud di destitucion di e magistradonan di Tribunal Supremo.
Ainda ta sperando e detayenan di e actividadnan pa e proximo dianan, mientras cu el a sigura cu dia 19 di april lo ta bay tin un “Gran Jornada de Protesta Nacional.” Entretanto, E secretario general di OEA, Luis Almagro a sigura di ta admira e curashi cu e pueblo Venezolano ta demostra riba caya pidiendo aplicacion di articulo 350 di Constitucion ya cu no a logra soluciona e crisis di e pais atraves di mediacion y dialaogo.
“E diasabra aki, miles y miles di Venezolano a sali pa manifesta dilanti di un autoritarismo na Venezuela y e represion tabata presente un biaha mas, , nan a cende e local di Henrique Capriles na candela, y soldaatnan di e regimen mester a obedece ordennan dictatorial y represivo pa enfrenta nan rumannan Venezolano riba caya”, el a expresa despues di recorda cu ya a haci un yamado na un fin di represion, na espirito democratico di e militarnan pa nan asumi nan rol y condena e inhabilitacion di Henrique Capriles.
Pa Almagro, e pueblo ta simplemente e forsa mas maraviyoso di universo, ni e cortamento di e derechonan, ni eleccion revocatorio y regional no realisa, ni tortura, ni e asesinatonan di francotirador cobarde, ni candela, ni e odio, por detene nan. “Uza represion, intimidacion y teror como herment di imposicion di poder ta e sintoma mas claro di debilidad di e regimen”, el a añadi.
El a sigura cu e pueblo Venezolano ya no tin miedo mas di atropeyo di gobierno y cu mundo henter por a mira e enfrentamento di diasabra pasa na Venezuela.
