(LaPatilla) – Venezuela ta den penultimo lugar den e Indice di Libertad Humano 2022, difundi algun dia atras, elabora pa institutonan di investigacion Cato y Fraser, cu sede na Washington y Canada respectivamente.
Den e clasificacion internacional e pais a obtene e posicion 164 di e 165 nacion cu a studia. A keda supera solamente pa Siria. E datonan mas relevante, maske abrumador segun expertonan, ta e puntuacion den e tema di libertad economico; den un baloracion di 1 pa 10, Venezuela a obtene apenas 3,32. Mientras cu den libertad personal a obtene 4,65 punto.
Otro indicador desalentador di e libertadnan personal ta relaciona cu estado di derecho den cual e baloracion ta di 1,6 riba 10 punto; y den libertad economico ta observa como detaye cu e calidad di e moneda no a alcansa ni sikiera un punto (0,9).
E imperio di ley, seguridad y proteccion, movemento, religion, asociacion, asamblea, sociedad civil, expresion y informacion, identidad y relacionnan, tamaño di gobierno, sistema legal y derechonan di propiedad, acceso na moneda fuerte, libertado di comercio internacional, regulacion di trabao, credito y negoshi, economia y libertad personal ta e areanan di estudio aborda pa ambos instituo aliado di e ONG nacional Cedice Libertad.
Den un comunicado di prensa, Cedice ta expone cu den ultimo 20 aña, Venezuela a cay 77 posicion den e apartado di libertad personal. Loke e vocero di e institucionnan internacional si a laga cla ta cu na nivel mundial e libertad personal a reduci, sobre todo despues di pandemia di Covid-19.
E unico puntuacionnan halto cu Venezuela a obtene tabata di libertad pa relaciona cu persona di mesun sexo y derechonan di hende muhe. Na mundo, e puntuacion mas halto a bay pa Suisa cu 8,95 den area di libertad personal; mientras cu na Latino America y Caribe, e punto mas halto tabata Bahamas cu 8,14 den area social y economico.
