(ElNacional) – Diamars mainta a cuminsa e demostracion di funcionarionan di Fuerza Armada Nacional Bolivariana, conoci manera e Plan Republica, pa eleccionnan local y regional di dia 21 di november.
Activacion di e operativo tabata lidera pa presidente di Conseho Nacional Electoral, Pedro Calzadilla, ken a destaca cu e cronograma electoral lo continua diaranson 17 di november cu demostracionnan na e capital-, estado- y municipionan, ocupacion di centronan di votacion y recepcion di material den e centronan.
Diahuebs e personal tecnico lo ricibi e materialnan pa eleccionnan y diabierna lo instala e mesanan, Calzadilla a indica, ken a detaya cu pa e eleccionnan aki nan a capacita mas di 14 mil centronan electoral y 30.106 mesa di votacion cu lo wordo custodia pa 98 mil funcionario di diferente cuerpo di seguridad.
El a informa tambe cu a activa e number 2637 pa ciudadanonan por manda mensahe di texto cu nan number di cedula pa ricibi informacion di unda nan mester bay vota. “Locual lo pasa diadomingo 21 di november lo ta un instante di e realisacion di e bida republicano”, el a sigura.
Di banda di oposicion, preocupacion a lanta pa e caso di estado Miranda, unda CNE no a haci substitucion di Carlos Ocariz pa David Uzcategui manera candidato di partido MUD debi cu nan ta considera cu el a anuncia su renuncia laat.
“CNE a publica un cronograma y e cronograma ey tabatin limitenan, e tabata establece cu te dia 11 di november tabata por a haci cambio ariba e lista di candidatonan”, Enrique Marquez a bisa diamars, rector principal di CNE.
Sinembargo, figuranan manera ex-alcalde Gerardo Blyde ta afirma cu CNE ta violando ley door di impedi e substitucion.
