(LaPatilla/EFE) – E vice presidente di Maduro, Delcy Eloina Rodriguez, ta biaha pa New Delhi den buskeda di aliansanan comercial nobo cu India, den e bishita di nivel mas halto den casi dos decada, fuentenan di EFE a confirma.
Rodriguez lo participa den e conferencia entre India y Latino America y Caribe (India-LAC), organisa pa gobierno di India, cu enfoke special e aña aki riba e pais Sur Americano, e organisadornan di e evento a indica na EFE.
E representante di Nicolas Maduro lo reuni ademas cu alto funcionaronan di e administracion di e prome minister nacionalista Narendra Modi, un miembro di e diplomacia di India a indica di su banda, sin duna detaye si esaki lo inclui un encuentro entre ambos.
Rodriguez lo coincidi cu Minister di Exterior di India, Subrahmanyan Jaishankar, den e apertura di e di nuebe conferencia India-LAC, den cual Venezuela lo tin un sesion.
Durante e reunion di dos dia lo delibera ariba con e comercio bilateral India-LAC por wordo duplica den e proximo cinco aña, y ki medidanan tin mester pa diversifica ainda mas e comercio bilateral, segun e programa di reunionnan ta señala.
Den e sesion tocante Venezuela, cu lo tuma luga diabierna, Rodriguez lo participa hunto cu presidente di e Centro de Inversion Productiva Venezolano, Felix Plasencia.
E bishita di nivel mas halto na New Dehli di parti di Venezuela a wordo concreta na 2005 cu e bishita di presidente fayecido Hugo Chavez pa reuni cu e gobierno di India, e tempo ey den man di e Partido di Congreso di e dinastia Nehru-Gandhi, locual a supone e impulso mas grandi di e relacion bilateral.
Den pasado Venezuela a expresa su boluntad di aumenta e exportacionnan di petroleo pa India, cu na su turno ta e base di Reliance Industries Limited, un di e poco refinerianan capaz di procesa crudo mediano y pisa cu ta wordo produci na Venezuela.
Rodriguez ya a biaha pa India na 2016, cu un delegacion di 14 miembro pa discuti e avancenan den un materia di acuerdonan cu a inclui asuntonan di petroleo y gas natural.
India a yega di ta e di dos cliente mas grandi pa e exportacionnan di petroleo na Venezuela y mas despues e mercado principal di petroleo y fuente di monedanan di e regimen di Maduro, te ora cu e sancionnan Mericano ariba e estatal PDVSA a hiba na e cancelacion di e importacionnan.
Na 2022, e gobierno di India a expresa su interes pa permiti e reanudacion di e suministro di petroleo di Venezuela y Iran, afecta pa e sancionnan, pa reduci e aumento di prijsnan internacional.
