Den ultimo dianan agentenan di e agencia Mericano di combati narcotrafico DEA a renta na varios oportunidad na e prison Spaño Soto del Real, unda ex-general Hugo Carvajal, ex-hefe di inteligencia y contra-inteligencia Venezolano, ta cera, segun e corant Colombiano El Tiempo.
Carvajal ta resisti contra su extradicion pa Merca, bao acusacion di narcotrafico, cu e argumento cu ta trata di un mero acto politico. Pero el e bay di acuerdo pa dialoga cu e agentenan pa obtene beneficio hudicial a cambio di informacion cu e tin di Nicolas Maduro y su hendenan cu ta manten’e den poder.
El Tiempo ta bisa cu un di e temanan riba tapete ta e relacionnan di e regimen cu e grupo terorista Hezbollah, califica pa gobierno di Trump como e principal menasa di seguridad di su pais.
Tin observadornan cu ta kere cu e tema aki, hunto cu e gigantesco operacion di labamento d placa cu e cahanan di cuminda Clap, revelacion haci recientemente pa departamento di Tesoro, por termina cu cera e cerco alrededor di e regimen di Maduro. Y den e capitulo ey, un Colombiano ta clave: Alex Saab Moran, acusa di ta ‘testaferro’ di Nicolas Maduro, y envolvi den maneho di e negoshi cu e cahanan di alimento Clap, supuestamente usa pa laba placa.
Ademas Carvajal lo tin informacion tocante e aliansa di Hezbollah cu Tareck El Aissami, vice-presidente di area di economia y ministro di industria di Venezuela. Siman pasa The New York Times a revela cu inteligencia Venezolano tin documento cu ta proba e lasonan entre Tareck El Aissami y Hezbollah. Entre otro El Aissami a percura pa 173 persona di Libia, Siria, Jordania, Irak y Iran, liga na Hezbollah, haya refugio y pasaporte Venezolano, pa duna nan proteccion contra entidad hudicial na diferente pais.
