Venezuela: crudo di mal calidad ta aumentando problemanan financiero

E proximo simannan lo ta crucial pa Venezuela, ya cu e por tin dificultad pa cumpli cu su enorme pago di debe. Informenan cu su produccion di petroleo ta experimentando un deterioro den calidad, ta establece otro causa di preocupacion pa e nacion Suramericano.

Segun e informenan aki, e empresa petrolero estatal Venezolano, PDVSA, ta mandando crudo cu creciente problema di calidad. Agencia noticiero Reuters a informa cu e envionan di petroleo ta “sushi, cu nivel halto di awa, salo y metal cu por causa problema pa e refinerianan.” E ta un situacion preocupante pa un compania petrolero cu ya ta sufri un fuerte caida den su produccion.

E problema di calidad ta relaciona cu e crisis economico di e pais. Sin efectivo, PDVSA ta luchando pa obtene e kimiconan adecua pa trata su petroleo, paga pa e ekiponan y e mantenimento pa sostene calidad. Como resultado, PDVSA mester a cera operacion o reduci produccion. “Nos ta reparando puntonan di inyeccion di producto kimico, recuperando pomp y tankinan di almacenamento,” un trahador di PDVSA a bisa Reuters. “Pero sin producto kimico, nos no por haci nada.”

E compania petrolero tabata mandando crudo cu aparentemente ta causando problema na e refinadornan di henter mundo. Segun Reuters, esey a genera keho y incluso cancelacion di compra. Phillips 66, un refinador di Merca, a cancela por lo menos ocho cargamento den prome mita di aña, debi na mal calidad. Tambe el a exigi descuento pa otro envionan. E refinadornan na India y China tambe a presenta keho.

E cancelacion di compra ta representa un menasa financiero grave pa un empresa asina y un pais cu ya ta hinca den un horible crisis economico. Por ehemplo, e envionan cancela tabata trata di petroleo cu tabata representa como US$ 200 miyon di valor, di acuerdo cu calculacion di Reuters. PDVSA ta e unico salbabida pa estado Venezolano, y si e unico fuente di entrada cu ta mantene e pais a flote no solamente ta disminuyendo, sino cu awor ta mustra un calidad decreciente, esey ta alarmante.

E produccion ta disminuyendo, placa efectivo ta cabando y e trahadornan petrolero ta bay for di e pais debi na escasez di alimento y pa via di violencia.

E problema pa PDVSA ta mustra mas grave pa e hecho cu desde un par di luna gobierno di Trump a impone restriccion pa areglonan financiero nobo cu e compania petrolero, prohibiendo e banconan Mericano di vincula cu PDVSA pa reestructura su debe. Como consecuencia, e medidanan ey tambe ta agrega un nivel nobo di presion pa e refinadornan di Merca cu ta haci negoshi cu PDVSA. Debi na e presion nobo di Washington, e refinadornan ta cuminsa busca nan crudo na otro parti. A informa cu e PBF Energy, e di cinco refinador mas grandi di Merca y cliente regular di PDVSA, a para e compra directo di e compania petrolero Venezolano.

E deterioro di e calidad, e caida di produccion y e sancionnan di Merca a provoca un fuerte descenso den e envionan desde Venezuela pa refinerianan di Merca. Durante gran parti di e aña aki, e importacionnan semanal di petroleo Venezolano na Merca a yega na promedio entre 600.000 y 800.000 bari pa dia (bpd), tin ora incluso mas cu esey. Pero e volumen a cuminsa collapse desde aproximadamente un luna. Pa e siman cu a caba dia 13 di october, e compranan Mericano di petroleo Venezolano a cay te na solamente 255,000 bpd, e total semanal mas abao den datonan di US Energy Information Administration (EIA) cu ta bolbe pa pasado te 2010. 

E momento pa esaki sucede no por tabata pio: Venezuela tin algun pago di debe exigente pa haci den e proximo simannan. Gobierno, sin duda, ta luchando pa haya un solucion. Presidente Nicolás Maduro a bisa na inicio di october cu e debe cu e empresa Ruso Rosneft lo por tin mester di un restructuracion. Aña pasa, gobierno a diseña un plan di restructuracion cu algun acreedor financiero pa evita incumplimento, extendiendo e pagonan pa e proximo añanan.

Na comienso di e luna aki, sin embargo, Venezuela a perde varios pago pa un total d US$ 349 miyon. Tin un periodo di gracia di 30 dia prome cu e pais ta tecnicamente den default, pero e retrasonan den pago a bira cada biaha mas comun durante ultimo aña. Te cu awe, contra tur pronostico, Venezuela no a keda sin cumpli.

Pero un prueba mas grandi ta bin aki un siman: entre 27 di october y 2 di november, Venezuela tin cu haci un enorme pago di US$ 2.000 miyon na e tenedornan di bono, y tin hopi incertidumbre si e por paga e suma aki. Y den e proximo tres simannan, Venezuela y PDVSA mester un total combina di US$ 4.4 biyon. Analistanan ta kere cu Banco Central di Venezuela tin un poco mas di US$ 9.000 miyon na reserva, pero gran parti di esey ta den oro, cu no ta activo likido. “Parce cu nan ta spaar cada cen pa e dos pagonan grandi aki,” Russ Dallen, socio gerente di Caracas Capital, a bisa Wall Street Journal.